GÜRCÜ-OSETİN QARŞIDURMASINDA GƏRGİNLİYİN ZƏİFLƏDİLMƏSİ MƏQSƏDİ İLƏ GÜRCÜSTAN HÖKUMƏTİ CƏNUBİ OSETİYA ƏRAZİSİNDƏ FÖVQƏLADƏ ƏLAQƏLƏNDİRMƏ MƏRKƏZİ YARATMIŞDIR
Prezidentin sözlərinə görə, mərkəzin yaradılması Gürcüstan əleyhinə düşünülmüş fitnəkarlığın qarşısını almaqla bağlıdır. “Qarşıdurmanı silahlı toqquşmaya gətirmək ölkədə başlanmış iqtisadi irəliləyişə mane olmaq və beynəlxalq aləmdə Gürcüstanı nüfuzdan salmaq məqsədi güdür”.
Bəyanatda RF-nin Dumasında Gürcüstan əleyhinə çıxışlara mənfi münasibət bəslənilərək, Şimali Osetiya strukturlarının münaqişəyə bilavasitə cəlb edilməsilə qondarma Cənubi Osetiya Respublikası ilə Gürcüstan arasında yox, məhz Gürcüstanla Rusiya arasında münaqişə yaratmağa cəhd göstərilməsi vurğulanır. Prezident, həmçinin qeyd edir ki, biz Rusiya ərazisindən Gürcüstana silah və canlı qüvvənin keçməsinə yol verməyəcəyik. Çünki bu, Rusiyanın da, Gürcüstanın da maraqlarına uyğun gəlmir.
AZƏRTAC-ın xüsusi müxbiri xəbər verir ki, iyulun 12-də İngiltərəyə rəsmi səfərə yola düşmüş Gürcüstan Prezidenti Mixail Saakaşvili Tbilisi aeroportunda jurnalistlər üçün keçirdiyi brifinqdə bilidirmişdir ki, “Münaqişə zonasında ciddi silahlı toqquşma cəhdinin qarşısı alındı. Gürcüstan təcavüzkar ölkə deyildir. Ancaq kənar qüvvələrin də bizə təzyiqinə dözməyəcəyik. Bir neçə gün öncə Gürcüstanın hüquq mühafizə orqanları tərəfindən Rusiyadan Sxinvaliyə gətirilən raketləri Rusiya tərəfi ilə birlikdə məhv etməyə hazırıq. Sxinvalidə son günlərin hadisələri Gürcüstanın beynəlxalq nüfuzuna xələl gətirmək niyyəti ilə edilir, lakin heç kəs buna nail ola bilməyəcəkdir. Bizim xarici ölkələrə səfərlərimiz məhz Gürcüstanın haqq səsini dünyaya çatdırmaq məqsədi güdür”.
Bölmənin digər xəbərləri
