Xalqla ordunun birliyi həm xalqın qüdrətini artırır, 

həm də ordunu daha qüvvətli edir 

Ümummilli lider Heydər Əliyev

Ordu quruculuğunun Heydər Əliyev dövrü

Bakı, 5 may, AZƏRTAC

Azərbaycanın müstəqilliyinin ilk illərində ölkədə mürəkkəb sosial-iqtisadi, ictimai-siyasi vəziyyət hökm sürürdü və bunun mənfi təsiri ordu quruculuğunda da özünü göstərdi. Könüllülərdən yaradılan ordu istər struktur, istərsə də güc baxımından mövcud şəraitin tələblərinə cavab vermir, yerli özünümüdafiə batalyonları məhəlli xarakter daşıyırdı. Vahid komandanlığın olmaması nəticəsində silahlı dəstələr müxtəlif şəxslərin əlində cəmləşərək onların əmrlərini yerinə yetirirdi. Bundan başqa, Azərbaycana xarici müdaxilə, Ermənistanın ərazi iddiaları ordu quruculuğunun normal, elmi əsaslarla aparılmasına mane olurdu.

1993-cü ildə ümummilli lider Heydər Əliyev hakimiyyətə qayıtdıqdan sonra vəziyyət köklü şəkildə dəyişməyə başladı. Ulu Öndər yerli özünümüdafiə və könüllü batalyonlar adı altında fəaliyyət göstərən silahlı birləşmələri ləğv etdi, vahid komandanlığa tabe olan nizami ordu yaratdı. Ulu Öndərin dəfələrlə ön xəttə səfər edərək əsgərlərimizlə səngərlərdə görüşməsi və onları döyüşə ruhlandırması real bəhrəsini verdi. Çox keçmədən ordumuz cəbhədə bir neçə uğurlu əməliyyat həyata keçirərək bir sıra yaşayış məntəqələrimizin düşməndən azad edilməsinə nail oldu. 1994-cü il mayın 12-də atəşkəs barədə saziş imzalandı və bu, ordu quruculuğunda köklü islahatlar aparılmasına şərait yaratdı. Orduya çağırışla bağlı bütün problemlər həllini tapdı, fərarilik halları aradan qalxdı. Şəxsi heyətin mənəvi-psixoloji hazırlığına, döyüş ruhunun yüksəldilməsinə diqqət artırıldı, hərbi vətənpərvərlik işi gücləndirildi. Ordu quruculuğunun müxtəlif sahələri ilə bağlı zəruri addımlar atıldı.

Heydər Əliyevin ordu quruculuğu istiqamətində açdığı yol Prezident, Ali Baş Komandan İlham Əliyev tərəfindən uğurla davam etdirilir

Ordu quruculuğu sahəsində əldə olunan nailiyyətlər hazırda Prezident İlham Əliyev tərəfindən uğurla davam etdirilir. Hələ 2003-cü ildə prezidentliyə namizəd ikən Ümummilli Liderimizin siyasətini bütün istiqamətlərdə davam etdirəcəyini, onun layiqli varisi olacağını bəyan etmiş İlham Əliyev digər sahələrdə olduğu kimi, hərbi quruculuq sahəsində də öz sözünün üstündə durdu və hazırda Heydər Əliyevin bu sahədəki siyasətini uğurla davam etdirməkdədir. Hərbi sahədə əsaslı islahatlar aparılır, bununla yanaşı, ordumuz yeni silah və texnika ilə təchiz edilir. Təminatı yaxşılaşdırmaq üçün Müdafiə Sənayesi Nazirliyi tərəfindən müxtəlif təyinatlı silah növləri istehsal edilir. “İstiqlal” snayper tüfəngi bu qəbildəndir. Silahlı Qüvvələrdə aparılan struktur dəyişiklikləri, döyüş əməliyyatlarının vahid rəhbərlik altında planlaşdırılması, hissələrin hərb elminin tələblərinə uyğun idarə edilməsi, kadrların saflaşdırılması Azərbaycan ordusunu keyfiyyətcə yeniləşdirib.

1990-cı illərin ortalarından başlayaraq Azərbaycan ilə NATO arasında sıx və səmərəli əməkdaşlıq mövcuddur. Bu əməkdaşlıq ordu quruculuğu prosesinin təkmilləşdirilməsinə, Silahlı Qüvvələrimizin modernləşdirilməsinə, müasir standartlara uyğunlaşdırılmasına gətirib çıxarıb. İndi hər il iki mindən çox hərbçimiz NATO proqramlarında iştirak edərək ən son hərbi yenilikləri mənimsəyir. 1997-ci ildən Azərbaycanın xüsusi təyinatlı təhsil müəssisələri NATO standartlarına keçib, Silahlı Qüvvələrimizin tərkibində yaradılan sülhməramlı tabor Şimali Atlantika Alyansının xətti ilə keçirilən hərbi-humanitar aksiyalarda fəal iştirak edir, münaqişə ocaqlarında təhlükəsizliyin, sülhün təminatına dəstək verir. Prezident İlham Əliyevin rəhbərliyi ilə ordu quruculuğu prosesi davamlı sürətdə təkmilləşdirilir, hərbi hissələr ən müasir hərbi texnika ilə təchiz olunur, yüksək şəraitə malik hərbi şəhərciklər, döyüş poliqonları yaradılır. Bütün bunların nəticəsidir ki, hazırda torpaqlarımızı düşməndən azad etməyə qadir, yüksək döyüş ruhuna malik ordumuz formalaşıb. Bu, özünü uğurlu aprel döyüşləri zamanı əyani şəkildə göstərdi.

Ordumuzun gücünü artıran, hərbçilərimizin döyüş əhval-ruhiyyəsini yüksəldən əsas amillərdən biri də Prezident İlham Əliyevin hərbi hissələrə, xüsusən cəbhə xəttinə ardıcıl səfərlər etməsidir. Ön xətdə xidmət edən əsgər və zabitlərimizlə hər görüşündə onlara sonsuz mübarizə əzmi aşılayan Ali Baş Komandan bununla da orduya diqqət və qayğısını əyani şəkildə nümayiş etdirir.

Hərb elminin inkişafı, hərbi təhsilin perspektivləri

Hazırda Silahlı Qüvvələrimizin təhsil sistemində müasir standartlara uyğun yeni proqram tətbiq edilir. Bu da yüksək hazırlığa malik zabit kadrların hazırlanmasına əhəmiyyətli təsir göstərir. Xüsusi təyinatlı təhsil müəssisələrinin professor-müəllim heyəti Türkiyənin, ABŞ-ın, Pakistanın, Litvanın, İordaniyanın, eləcə də NATO-nun hərbi təhsil müəssisələrinin nümayəndələri ilə vaxtaşırı təcrübə mübadiləsində iştirak edir. Azərbaycan-NATO Birgə Təlim və Tədris Fəaliyyət Planına müvafiq olaraq, Silahlı Qüvvələrin xüsusi təyinatlı təhsil müəssisələrinin tədris proqramlarının təkmilləşdirilməsi məqsədilə Hərbi Akademiyada tədris proqramına “Müdafiə strategiyası və planlaşdırılması” kimi yeni fənn daxil edilib.

Cəbhə bölgəsində yerləşən birləşmələrin döyüş texnikası ilə silahlandırılması hərbi hissələrin atəş gücünü və manevr qabiliyyətini artırıb. Qoşunların sərəncamına daha müasir minaatan, tank əleyhinə idarəolunan raket, daşınan zenit-raket kompleksləri və müxtəlif qumbaraatanlar verilib. Bu proses hazırda da davam etdirilir. Təlimlərdə hərbi hissələrin döyüş hazırlığının səviyyəsi yoxlanılır, döyüş texnikalarının, müasir silahların tətbiqi imkanları öyrənilir, tapşırıqların daha operativ və səmərəli yerinə yetirilməsi, qərargahlar tərəfindən əməliyyatların hazırlanması, qarşılıqlı fəaliyyətin və təminatın təşkili səviyyəsi yoxlanılır.

Azərbaycan əsgərinin hərbi-vətənpərvərlik tərbiyəsi

Rus ədibi Denis Fonvizin deyib ki, namuslu insan olmaq istəyirsənsə ömrünün mənasını vətənə xidmətdə gör. Vətənpərvərlik tərbiyəsinin əsas məqsədi vətəndaşlıq borcunu yerinə yetirməyə can atan mənəvi, psixoloji və fiziki keyfiyyətlərə malik olan insanı tərbiyə etməkdir. Hərbi vətənpərvərlik dedikdə əsasən üç vacib element nəzərdə tutulur: mənəvi-siyasi, hərbi texniki və fiziki psixoloji hazırlıq. Bütövlükdə hərbi vətənpərvərlik tərbiyəsinin əsasını Vətən anlayışının aliliyi, hərbi anda sədaqət, Vətənin müdafiəsinə hazırlıq, milli rəmzlərə hörmət meyarı təşkil edir. Müasir dövrdə Azərbaycan gənclərinin hərbi-vətənpərvərlik tərbiyəsi mühüm əhəmiyyət daşıyır və bu mənada, gənc nəslin psixoloji, mənəvi baxımdan hərbi xidmətə hazırlanması vacib məsələlərdəndir. Bu gün hazırkı dünyagörüşümüzü Vətən anlayışı, Vətənə sevgi hissi olmadan təsəvvür etmək mümkün deyil. Hərbi xidmət gənclərin vətənpərvər vətəndaş kimi formalaşmasında önəmli amildir. Hərbi xidmət gənclər üçün həm də bir həyat məktəbidir. Hərbi xidmət gənclərin gələcəyi üçün çox faydalıdır. Gənclərin hərbi vətənpərvərlik tərbiyəsi işinin gücləndirilməsi, onların hərbi xidmətə hazırlanması, gənclər arasında hüquq pozuntularının, narkomaniyanın və digər zərərli vərdişlərin profilaktikası sahəsində tədbirlərin həyata keçirilməsi, istedadlı gənclərin aşkar edilməsi, onların öz qabiliyyətlərini inkişaf etdirə bilmələri üçün şəraitin yaradılması kimi məsələlər gənclərlə bağlı qəbul edilmiş dövlət proqramlarında əksini tapıb. Ölkənin ictimai-siyasi həyatında gənclərin fəal iştirakı, uşaq və gənclərlə bağlı təşkilatların formalaşması və inkişafı üçün şəraitin yaradılması, gənclərin beynəlxalq əməkdaşlığı sahəsində layihələrin həyata keçirilməsi, gənclər təşkilatlarının beynəlxalq əlaqələrinin qurulması, onların nümayəndələrinin beynəlxalq tədbirlərdə iştirakına kömək göstərilməsi əsas prioritetlərdən hesab edilir.

Azərbaycanın hərb tarixi, uğurlu döyüş əməliyyatları, qazanılan qələbələr

Azərbaycan xalqının Vətənin müdafiəsi uğrunda qəhrəmanlığının qədim və zəngin tarixi var. Prezident İlham Əliyevin hərbi sahəyə diqqət və qayğısı sayəsində bu gün Azərbaycan Ordusu regionun ən qüdrətli ordusuna çevrilib. Azərbaycan Ordusunun 2016-cı il aprelin 2-dən 5-dək davam edən uğurlu əks-hücum əməliyyatları ölkəmizə hərbi-strateji nöqteyi-nəzərdən çox böyük üstünlüklər verdi. İlk növbədə, Azərbaycan çox mühüm psixoloji qələbə qazandı. Aprel döyüşləri Azərbaycan xalqının birliyini nümayiş etdirdi. Aprel döyüşlərində Talış kəndi istiqamətində olan yüksəkliklər düşməndən azad edildi və ətraf yaşayış məntəqələrinin, o cümlədən Tap Qaraqoyunlu kəndinin təhlükəsizliyi təmin olundu. Lələtəpənin işğaldan azad olunması isə Cocuq Mərcanlının təhlükəsizliyini təmin etdi və kənddə yaşayış üçün imkan yarandı. Lələtəpədəki düşmən mövqeləri həm Cocuq Mərcanlı və onun ətrafı, həm də müəyyən qədər Horadiz qəsəbəsi üçün təhlükə yaradırdı. Azərbaycan Silahlı Qüvvələrinin bölmələri aprel döyüşləri zamanı verilmiş tapşırığı yerinə yetirdikdən sonra Cocuq Mərcanlı kənd sakinlərinin doğma evlərinə qayıdıb rahat yaşamaları üçün təhlükəsizlik tam təmin olundu. Aprel döyüşləri Azərbaycan Ordusunun döyüş əzminin göstəricisi, Azərbaycan xalqının birliyinin nümayişi idi. Bu, düşmənə və onun havadarlarına bir mesaj idi ki, danışıqlar nəticə vermədiyi təqdirdə Azərbaycan Ordusu qısa müddətdə üzərinə düşən vəzifəni yerinə yetirəcək və işğal altında olan bütün tarixi torpaqlarını azad edəcək.

Prezident İlham Əliyev Azərbaycan xalqı və dövlətinin işğal, etnik təmizləmə siyasəti ilə heç vaxt barışmayacağını və torpaqlarımızı azad etmək üçün əsasımızın olduğunu, bunun beynəlxalq hüquq normaları ilə təsdiq edildiyini vurğulayaraq deyib: “Azərbaycanın ərazi bütövlüyü bərpa edilməlidir. Biz heç vaxt Azərbaycan ərazisində ikinci qondarma erməni dövlətinin yaranmasına icazə verməyəcəyik. Heç vaxt Dağlıq Qarabağa müstəqillik verilməyəcək. Əgər kimsə bunu gözləyirsə, qoy, əbəs yerə gözləməsin. Bu, olmayacaq”.

Yazı “Azərbaycan Silahlı Qüvvələrinin 100-cü ildönümünə həsr olunmuş “Hər birimiz Vətənə xidmət edirik” mövzusundakı yazı müsabiqəsinə təqdim edilir.