Bakı, 28 dekabr (AZƏRTAC). Hindistan KİV-lərinin verdiyi məlumata görə, əsas vəzifəsi korrupsiyaya qarşı mübarizə aparmaqdan ibarət olan “Sadə insanların partiyası”nın lideri Arvind Kecrival şənbə günü Dehlinin Baş naziri kimi and içmişdir.

45 yaşlı Kecrival Hindistanın Milli Paytaxt Ərazisinin ən gənc rəhbəri olmuşdur. Mərasimin keçirildiyi meydanda Kecrivalın 40 minə yaxın tərəfdarı toplaşmışdı. Dehli hökumətinə Baş nazirdən əlavə onun partiyasını təmsil edən daha 6 nazir daxil olacaqdır. Onlar da and içməlidirlər.

Andiçmə mərasimindən əvvəl Kecrival demişdir: “Bizim mübarizəmiz korrupsiyaya, aclığa və yoxsulluğa qarşıdır. Bu qələbə adi insanların qələbəsidir”.

Xatırladaq ki, dekabr ayının əvvəlində Milli Paytaxt Ərazisinin qanunverici orqanına seçkilər keçirilmişdir. Hakim Hindistan Milli Konqres Partiyası 70 deputat yerindən cəmi 8-ni qazanaraq seçkilərdə uduzmuşdur. Hindistanın əsas müxalifətçi partiyası olan Bxaratiya Canata Partiyası ən çox səs toplayaraq 32 mandat, “Sadə insanların partiyası” isə 28 mandat qazanmışdır.

Hindistan Milli Konqres Partiyasının nümayəndəsi, 1998-ci ildən Dehli hökumətinə başçılıq edən Şeyla Dikşit istefa vermişdir.

Seçkilərdən sonra Kecrival Hindistan Milli Konqres Partiyasının rəhbərliyi ilə koalision hökumət yaradılması barədə razılığa gəlmişdir. Bu hökumətə Kecrival özü başçılıq edəcəkdir. Ekspertlər Kecrivalın partiyasının bu uğurunu sensasiya hesab edirlər. Partiya öz seçki kampaniyasında məhz sadə insanların problemlərini diqqət mərkəzində saxlayırdı.

KİV-lər yazırlar ki, indi bu partiya ümummilli miqyasda hakimiyyət uğrunda mübarizəyə başlaya bilər.