Bakı, 20 oktyabr, AZƏRTAC

Bakı Şəhər Mədəniyyət Baş İdarəsinin Səbail rayon Mərkəzləşdirilmiş Kitabxana Sisteminin Mərkəzi Kitabxanası və C.Cabbarlı adına Azərbaycan Dövlət Teatr Muzeyinin təşkilatçılığı ilə Azərbaycan ədəbiyyatının görkəmli nümayəndəsi, şair, dramaturq Hüseyn Cavidin anadan olmasının 140 illiyinə həsr olunmuş tədbir təşkil olunub.

Baş İdarədən AZƏRTAC-a bildirilib ki, tədbirdə Hüseyn Cavidin ədəbiyyatımızın ən parlaq simalarından biri olduğu, onun bütün zamanlar üçün əbədiyaşarlığı vurğulanıb. Çıxışlarda Cavid yaradıcılığı bir daha yad edilib, əsərləri haqqında ətraflı məlumat verilib və görkəmli yazıçının ömür yoluna nəzər salınıb, eləcə də şagirdlərin ifasında “İblis” əsərindən parça təqdim olunub.

Mərkəzi Kitabxananın hazırladığı Hüseyn Cavidin əsərlərindən ibarət kitab sərgisi və C.Cabbarlı adına Azərbaycan Dövlət Teatr Muzeyinin Cavidin teatr yaradıcılığını əks etdirən fotosərgi açılıb.