ICESCO nümayəndəsi: Azərbaycanlı həkimlər “Kosmik təbabətin əsasları” proqramı çərçivəsində təlim keçmək üçün Bəhreynə gedəcəklər
Bakı, 26 aprel, Pərvanə Qafarova, AZƏRTAC
“STC kosmik ekosistem yaratmaq və kosmik elmləri inkişaf etdirmək məqsədi ilə kosmik həvəskarları, eləcə də müxtəlif şirkətləri bir araya gətirən gözəl və heyrətamiz hadisədir. Konfrans 2022-ci ildən keçirilir və mən 2023-cü ildə Daşkənddə onun iştirakçısı olmuşam”.
Bu barədə İslam Təhsil, Elm və Mədəniyyət Təşkilatının (ICESCO) müşaviri, doktor Məhəmməd Şərif Bakıda keçirilən Kosmik Texnologiyalar Konfransı (STC2025) çərçivəsində AZƏRTAC-a müsahibəsində deyib.
“Azərbaycanla əməkdaşlığımıza və tərəfdaşlığımıza gəlincə, biz bir sıra təşəbbüslər üzərində işləyirik. Belə ki, Azərbaycanda “A-Hub Accelerator (ISSCO-AHUB)” proqramına start verilib. Ötən il Şuşada bu proqramın qaliblərinin mükafatlandırılması mərasimi keçirilib. Bizim həmçinin “Kosmik təbabətin əsasları” beynəlxalq təlim proqramımız var. Ona da Azərbaycanda start verilib və həmçinin “Azərkosmos” ilə birgə, hazırda onun coğrafiyası genişlənməkdədir. Biz 500 həkimdən ibarət daha bir qrup təşkil edərək, onları kosmik təbabət üzrə təlim keçmək üçün Bəhreynə göndərmək niyyətindəyik”, - deyə ICESCO nümayəndəsi sözünü yekunlaşdırıb.
Qeyd edək ki, ötən ilin dekabr ayında Azərbaycan Kosmik Agentliyi (“Azərkosmos”) İslam Təhsil, Elm və Mədəniyyət Təşkilatı (ICESCO) ilə birgə Azərbaycanda ilk dəfə olaraq “Kosmik təbabətin əsasları” mövzusunda beynəlxalq təlim keçirib.
Bölmənin digər xəbərləri
