İdarə etdiyi avtomobillə piyadanı vurub qaçan sürücü məsuliyyətə cəlb olunub
Bakı, 29 yanvar, AZƏRTAC
Bakı şəhər sakini S.Şeşbekovanın yanvarın 26-da xəsarətlə xəstəxanaya yerləşdirilməsi barədə Sabunçu Rayon Polis İdarəsinin 13-cü polis bölməsinə məlumat daxil olub.
Daxili İşlər Nazirliyinin mətbuat xidmətindən AZƏRTAC-a bildiriblər ki, məlumatla əlaqədar polis əməkdaşları tərəfindən dərhal müvafiq tədbirlər görülüb. Araşdırmalarla qadının Bakıxanov qəsəbəsi R.Rüstəmov küçəsində yolu keçərkən avtomobillə vurulması müəyyən edilib.
Hadisənin “Mercedes” markalı avtomobillə törədildiyi əməliyyat-axtarış tədbirləri ilə qısa müddətdə müəyyənləşdirilib. Həmin nəqliyyat vasitəsini idarə edən və hadisə yerindən yayınmaqda şübhəli bilinən Bakı şəhər sakini E.Mirzəyev polis əməkdaşları tərəfindən saxlanılıb.
Hazırda faktla bağlı araşdırma aparılır.
Bölmənin digər xəbərləri
