İdarə rəsmisi: Bakıda təmirlə əlaqədar hərəkətin məhdudlaşdırıldığı yollarda polis əməkdaşları tərəfindən xidmət təşkil edilir
Bakı, 16 may, AZƏRTAC
“Bakı şəhər Dövlət Yol Polisi İdarəsi tərəfindən baş verə biləcək yol-nəqliyyat hadisələrinin qarşısının alınması məqsədilə mütəmadi olaraq nəzarət-profilaktik tədbirlər davam etdirilir. Paytaxt ərazisində qəzaların baş verməsinin əsas səbəbi sürət həddinin aşılması, ara məsafənin saxlanılmaması, sükan arxasında telefondan istifadə, yol ayırıcını keçmə, manevr etmə və nasaz nəqliyyat vasitələrindən istifadədir. Sürücülər daha diqqətli olmalı və yol hərəkəti qaydalarına ciddi şəkildə əməl etməlidirlər. Eyni zamanda, hər bir yol hərəkəti iştirakçısı qaydalara ciddi şəkildə riayət etməli, özünün, eləcə də digər hərəkət iştirakçısının həyat və sağlamlığını təhlükə altına atmamalıdır”.
Bunu AZƏRTAC-a açıqlamasında Bakı Şəhər Dövlət Yol Polisi İdarəsinin (DYPİ) Hərəkətin təhlükəsizliyinin təbliği və ictimai qurumlarla əlaqə bölməsinin rəisi Toğrul Nəsirli deyib.
T.Nəsirli vurğulayıb ki, yollarda sürət həddinin aşılması nəinki qanun pozuntusu, eyni zamanda, insan həyatına yönəlmiş təhlükədir. Onun sözlərinə görə, ağır yol-nəqliyyat hadisələrinin əsas səbəblərindən biri sürət həddinin aşılmasıdır: “Bu cür məsuliyyətsiz davranış nəticəsində ailələr övladlarını, doğmalarını itirirlər. Sürəti artırmaq nəqliyyat vasitəsinə nəzarəti itirmək, həm digər nəqliyyat vasitələrindəki şəxslərin, həm də piyadaların həyatını təhlükəyə atmaq deməkdir. Sürücülər bilməlidirlər ki, yol nişanlarında göstərilən sürət həddi insan həyatının sərhədidir. Onlar qanunla müəyyən olunmuş sürət həddinə, yol və hava şəraitinə uyğun hərəkət etməlidirlər”.
İdarə rəsmisi həmçinin əlavə edib ki, paytaxtda təmirlə əlaqədar hərəkətin məhdudlaşdırıldığı yollarda polis əməkdaşları tərəfindən xidmət təşkil edilir. Sürücülərin nəqliyyat vasitələrinin digər alternativ yollara istiqamətləndirilməsi təmin edilir.
Bölmənin digər xəbərləri
