İLKİN MƏNZİL BAZARINDA ORTA QİYMƏT ARTIMI ƏN ÇOX SABUNÇU RAYONUNDA QEYDƏ ALINMIŞDIR
“Əmlak Bazarı İstehlakçıları” İctimai Birliyindən AZƏRTAC-a bildirmişlər ki, aprelin sonuna olan məlumata əsasən, Bakı şəhərində 216 şirkət tərəfindən 580 binanın tikintisinin aparıldığı müəyyən edilmişdir. Yeni binalar ən çox Yasamal rayonu ərazisində tikilir.
Mənzillərin orta qiyməti mart ayı ilə müqayisədə 1,4 faiz artaraq bir kvadratmetri 1076 ABŞ dollarından 1091 dollara çatmışdır. Səbail, Xətai, Nərimanov və Suraxanı rayonları istisna olmaqla, digər rayonlar üzrə orta qiymətlər cüzi şəkildə artmışdır. Ən çox artım Sabunçu rayonu üzrə (6,6 faiz) qeydə alınmışdır. Təkrar bazarda bağlanan əqdlərin dinamikası, mart ayında olduğu kimi, azalma ilə müşayiət olunmuşdur. Mart ayı ilə müqayisədə təkrar bazarda təklif 23,5 faiz artmışdır. Ay ərzində satış üçün bazara orta hesabla 6 mindən çox mənzil təklif olunmuşdur. Təklif portfelində Yasamal, Nəsimi və Nərimanov rayonlarının payı müvafiq olaraq 21,7, 19 və 18,5 faiz artmışdır.
Aprel ayı ərzində bir kvadratmetrin orta qiyməti 1.659 dollara yüksəlmişdir. Təkrar bazarda orta qiymətlər Yasamal, Nizami, Nəsimi, Suraxanı, Sabunçu, Xətai rayonlarında sabit qalsa da, digərlərində azalma baş vermişdir.
Bazarda qiyməti 90 min ABŞ dollarından yuxarı olan mənzillər ümumi portfeldə 54,23 faiz təşkil edir. Mənzillərin orta otaq göstəricisi 2,39 (azalma 2,8 faiz), hər otağın orta satış qiyməti 51 min 341 dollar, mənzilin orta qiyməti isə 122 min 704 dollar olmuşdur.
Bölmənin digər xəbərləri
