İngilis dilinin tədrisi üzrə “XXI əsrin müəllimi” layihəsinin həyata keçirilməsi ilə bağlı sənəd imzalanmışdır
Bakı, 13 sentyabr (AZƏRTAC). Sentyabrın 13-də təhsil nazirinin müavini Ceyhun Bayramov Britaniya Şurasının ölkə üzrə direktoru xanım Elizabet Vayt ilə görüşmüşdür.
Təhsil Nazirliyindən AZƏRTAC-a bildirmişlər ki, ikitərəfli görüşdə ingilis dilinin tədrisi üzrə “XXI əsrin müəllimi” layihəsinin həyata keçirilməsi ilə bağlı rəsmi sənəd imzalanmışdır.
Sənədi təhsil nazirinin müavini C. Bayramov və Britaniya Şurasının ölkə üzrə direktoru xanım E. Vayt imzalamışlar.
Layihə çərçivəsində Azərbaycanın ümumi təhsil müəssisələrinin ingilis dili müəllimləri tədris prosesində daha yeni metod və vəsaitlərdən istifadə imkanlarını öyrənəcək, eyni zamanda, maraqlı dərslərin təşkili üçün lazımi bilik qazanacaqlar.
“XXI əsrin müəllimi” layihəsi çərçivəsində ötən illərdə Bakı şəhərində müvafiq iş həyata keçirilmişdir. Bu il isə ilk dəfə olaraq müəllim-təlimçilər respublikanın digər rayonlarında da olacaqlar.
İngilis dili biliklərinin yüksəldilməsi üçün cari ildə reallaşdırılacaq layihə əvvəlki illərdə həyata keçirilmiş layihələrdən miqyası və yayılma imkanları ilə fərqlənəcəkdir. Belə ki, sentyabrda başlanacaq layihəyə 15 rayondan 50 pilot məktəb cəlb olunacaqdır. Təlimlər Qəbələ, Şəki, Quba, Şamaxı, Gəncə, Mingəçevir, İsmayıllı, Xaçmaz, Zaqatala, Yevlax, Göyçay, Şirvan, Lənkəran, Salyan və Qusarla yanaşı, Bakı və Sumqayıtda da keçiriləcəkdir. Ümumilikdə, 520 müəllim bu təlimlərdə iştirak edəcəkdir. Layihənin yekununda ingilis dili müəllimlərinin müasir təlim metodları sahəsində peşəkar bilik və bacarıqlarının inkişaf edəcəyi və ingilis dilinin təlim keyfiyyətinin daha da yüksələcəyi gözlənilir. Layihədə Britaniya Şurasının 24 nəfər müəllim-təlimçisi iştirak edəcəkdir.
Təlim kurslarının sonunda iştirakçılara müvafiq sertifikatlar təqdim olunacaqdır. Təhsil Nazirliyi və Britaniya Şurası bu istiqamətdə oxşar layihələrini bundan sonra da daha geniş miqyasda davam etdirəcəklər.
Bölmənin digər xəbərləri
