İNSAN ALVERİ İLƏ MÜBARİZƏ MÜASİR DÖVRÜMÜZÜN AKTUAL PROBLEMİDİR
Bakı, 8 aprel (AZƏRTAC). Aprelin 8-də Azərbaycan Dövlət Pedaqoji Universitetində (ADPU) Təhsil və Daxili İşlər nazirliklərinin birgə təşkilatçılığı ilə insan alveri mövzusunda tədbir keçirilmişdir.
ADPU-nun prorektoru Rafiq Baxşəliyev müasir dövrdə cəmiyyətin qarşılaşdığı əsas problemlərdən birinin də insan alveri ilə bağlı olduğunu, bu cinayətin narkotika alverindən sonra daha geniş vüsət alan ictimai bəlalardan biri kimi ciddi fəsadlar törətdiyini bildirmişdir.
Belə tədbirlərin gənclər arasında keçirilməsinin xüsusilə mühüm əhəmiyyət kəsb etdiyini söyləyən R.Baxşəliyev, Daxili İşlər Nazirliyində yaradılmış müvafiq idarənin ölkəmizdə bu cinayətin qarşısının alınması istiqamətində bir sıra zəruri tədbirlər gördüyünü vurğulamışdır.
Daxili İşlər Nazirliyinin İnsan Alverinə Qarşı Mübarizə İdarəsi rəisinin müavini, polis polkovniki İmran Nəcəfov insan alveri ilə mübarizənin sovet imperiyası dağılandan sonra xüsusilə çox böyük və aktual məsələyə çevrildiyini qeyd etmişdir. Hatiq demişdir ki, Azərbaycan müstəqillik qazandıqdan, sərhədlər açıldıqdan sonra ölkəmizdə insan alveri ilə əlaqəli cinayətlərin sayı artmışdır. Bunun da başlıca səbəbi müstəqilliyin ilk illərində ölkənin iqtisadi tənəzzülü, əhalinin sosial-iqtisadi vəziyyətinin getdikcə pisləşməsi, insanların yaşamaq uğrunda hətta ən çirkin vasitələrə əl atması olmuşdur.
DİN rəsmisi diqqətə çatdırmışdır ki, yalnız ümummilli lider Heydər Əliyevin Azərbaycanda hakimiyyətə qayıdışından sonra ictimai-siyasi sabitlik bərqərar olmuş, respublikamız iqtisadi inkişaf dövrünə qədəm qoymuş, insanların maddi rifahı durmadan yüksəlmişdir. Bu sahədə görülən işlər barədə məlumat verən natiq demişdir ki, son zamanlar insan alverinə qarşı mübarizə ilə bağlı bir sıra zəruri sənədlər qəbul olunmuş, bu sosial bəladan zərər çəkmiş vətəndaşlara maddi və mənəvi yardım göstərilmişdir.
Tədbirdə universitet tələbələrinin sualları cavablandırılmışdır.
Bölmənin digər xəbərləri
