İordaniyalı insan hüquqları müdafiəçisi: Xidmətlərə çıxışın təmin olunması yalnız fiziki baryerlərin aradan qaldırılması ilə məhdudlaşmır
Bakı, 28 aprel, AZƏRTAC
QHT-lər daim öz icmalarının ehtiyaclarını əsas götürərək fəaliyyət göstərir. İcma dedikdə, yalnız ümumi insan qruplarını deyil, eyni zamanda, cəmiyyətin ən həssas və tez-tez diqqətdən kənarda qalan təbəqələrini - əlilliyi olan şəxsləri nəzərdə tuturuq. Bizim fəaliyyətimizdə əsas prinsip onların özlərinin prosesi formalaşdıran və rəhbər rolunda olmasıdır.
AZƏRTAC xəbər verir ki, bu fikirləri iordaniyalı insan hüquqları müdafiəçisi və ictimai fəal, “I am human” qeyri-hökumət təşkilatının təsisçisi Asiya Abdel Mutaleb Yaghi aprelin 28-də Bakıda keçirilən “Həmrəy fəaliyyət: yeni və ədalətli dünya üçün Qlobal Cənub QHT-lərinin gücləndirilməsi” adlı forumda deyib.
O qeyd edib ki, bu forum vacib məsələləri müzakirə etmək imkanı yaradan vacib platformadır: “Xidmətlərə çıxışın təmin olunması yalnız fiziki baryerlərin aradan qaldırılması ilə məhdudlaşmır. Bu, həm də informasiya, təhsil, səhiyyə, hüquqi müdafiə və digər sahələrdə tam iştirak imkanlarının yaradılması deməkdir. Xüsusi işarə dili xidmətlərinin göstərilməsi, əlilliyi olan şəxslər üçün uyğunlaşdırılmış avadanlıqların və kommunikasiya vasitələrinin təmin edilməsi bizim borcumuzdur. Çünki bu olmadan onların cəmiyyət həyatına tam və bərabər şəkildə qoşulması mümkün olmayacaq”, - deyə o əlavə edib.
Bölmənin digər xəbərləri
