İran müəssisələri ilə maşınqayırma sahəsində əməkdaşlıq imkanları müzakirə edilib
Bakı, 12 mart, AZƏRTAC
İran müəssisələri ilə maşınqayırma sahəsində əməkdaşlıq məsələləri müzakirə edilib.
İqtisadiyyat Nazirliyinin mətbuat xidmətindən AZƏRTAC-a bildirilib ki, müzakirələr martın 12-də iqtisadiyyat naziri, Azərbaycan Respublikası ilə İran İslam Respublikası arasında iqtisadi, ticarət və humanitar sahələr üzrə Dövlət Komissiyasının həmsədri Şahin Mustafayev İran İslam Respublikasının Şərqi Azərbaycan əyalətinin valisinin ictimai-siyasi məsələlər üzrə müavini Səid Şəbistərinin rəhbərlik etdiyi nümayəndə heyəti ilə görüşü zamanı aparılıb.
Nazir Şahin Mustafayev Azərbaycan və İran arasında siyasi əlaqələrin yüksək səviyyədə olduğunu, iqtisadi əməkdaşlığın inkişafı üçün geniş potensialın mövcudluğunu qeyd edib. Bildirilib ki, son illər dövlət başçılarının qarşılıqlı rəsmi səfərlərindən və keçirilən görüşlərdən sonra Azərbaycan-İran əlaqələri, eləcə də İranın regionları ilə əməkdaşlıq daha da genişlənib. Şərqi Azərbaycan vilayətinin nümayəndə heyətinin ölkəmizə səfəri də əlaqələrimizin inkişafına öz müsbət töhfəsini verəcək. Nazir Şahin Mustafayev iqtisadiyyatın müxtəlif sahələrində olduğu kimi, sənaye, o cümlədən maşınqayırma sahəsində əlaqələrin genişləndirilməsi imkanlarını diqqətə çatdırıb.
İran İslam Respublikasının Şərqi Azərbaycan əyaləti valisinin müavini Səid Şəbistəri dövlət başçılarının birgə səyləri nəticəsində son illər ölkələrimiz arasında əlaqələrin genişləndiyini, təmsil etdiyi vilayətin sənaye sahəsində Azərbaycanla əməkdaşlığın inkişafında maraqlı olduğunu bildirib. Rəhbərlik etdiyi nümayəndə heyətinin tərkibində maşınqayırma sahəsində fəaliyyət göstərən müəssisələrin təmsil olunduğunu qeyd edən Səid Şəbistəri Azərbaycanın bu sahədə fəaliyyət göstərən şirkətlərini ölkəsinə dəvət edib. İranlı qonaq Azərbaycanda sənaye parklarının yaradılmasını müsbət qiymətləndirib.
Görüşdə İranın Təbriz Traktorqayırma Zavodu və avtobus istehsalçısı olan “AKİA” Maşınqayırma Zavodu barədə məlumat verilib, əməkdaşlıq imkanlarına dair fikir mübadiləsi aparılıb.
Səfər çərçivəsində İran nümayəndə heyəti Sumqayıt Kimya Sənaye Parkında da olub. Qonaqlara sənaye parkında investorlar üçün yaradılmış əlverişli imkanlar, parkın rezidentləri tərəfindən istehsal olunan məhsullar barədə məlumat verilib. Sonra İran nümayəndə heyəti ilə Azərbaycanın maşınqayırma müəssisələrinin nümayəndələri arasında görüş keçirilib. Görüşdə Təbriz Traktorqayırma Zavodu və “AKİA” Maşınqayırma Zavodu ilə Azərbaycanın maşınqayırma müəssisələri arasında əməkdaşlıq perspektivləri müzakirə olunub.
Səfər zamanı İran nümayəndə heyəti Sumqayıt Texnologiyalar Parkı ilə də tanış olub.
Bölmənin digər xəbərləri
