İRAN PREZİDENTİ ƏHMƏDİNEJAD İLƏ DOSTLUQ EDƏN RAVVİNİN UŞAQLARI MƏKTƏBDƏN QOVULMUŞLAR
Holokostu inkar edənlərin Tehranda keçirilən konfransında iştirak etmiş ravvinin uşaqları Avstriya paytaxtında yəhudi məktəbindən qovulmuşlar.
AZƏRTAC xarici KİV-lərə istinadla xəbər verir ki, ravvin Moşe Arye Fridmanın sözlərinə görə, onun dörd uşağını məktəbdən qovmuş və Avstriya ərazisində heç bir yəhudi məktəbinə qəbul etməyəcəklərini söyləmişlər.
Məktəbdən onun adına göndərilən məktubda deyilir ki, uşaqların təhsil ocağından qovulmasına ravvinin Holokosta həsr edilmiş konfransda biabırçı hərəkəti səbəb olmuşdur. Fridman deyir ki, Holokostu inkar etmir. Konfrans zamanı o, Əhmədinejadı inandırmağa çalışmışdır ki, qəzəbini yəhudi xalqına deyil, İsrail dövlətinə yönəltsin. Ravvinin və ifrat ortodoksal “Neturey Karta” yəhudi təriqətinin üzvlərinin fikrincə, İsrail indiki şəkildə mövcud ola bilməz, çünki əsl yəhudi dövlətini yalnız Məsih yarada bilər. Buna görə də Fridman İran hakimiyyətinin İsrailin dünya xəritəsində yeri olmaması fikri ilə tamamilə razıdır.
Məktəbdən çıxarılmış uşaqların atası təhsil ocağını məhkəməyə vermək niyyətindədir.
Bölmənin digər xəbərləri
