İran Prezidentinin Azərbaycana səfərindən sonra münasibətlərin dərinləşməsi və inkişafı üçün yeni şərtlər formalaşıb – RƏY
Bakı, 30 aprel, AZƏRTAC
Beynəlxalq münasibətlərdə geosiyasət, yəni, mövcud olduğumuz coğrafiyada yerləşən dövlətlərlə münasibətlərin keyfiyyəti olduqca əhəmiyyətlidir. Nəticə etibarilə coğrafi mövqe hər bir dövlətin xarici siyasətini də təyin edən əsas amillərdən biri kimi çıxış edir. Coğrafi mövqeyin reallıqlarını milli maraqlar baxımından strateji üstünlüyə çevirmək bacarığı milli diplomatiyanın əsas vəzifələrindən biridir. Bu mənada Azərbaycan yerləşdiyi coğrafiyada bütün qonşularla yaxşı əlaqələr yaratmağa çalışır. Təsadüfi deyil ki, tarix boyu müxtəlif mərhələlərdən keçmiş Azərbaycan-Rusiya münasibətləri bu gün məhz bu kontekstdə müttəfiqlik qarşılıqlı fəaliyyəti haqqında Bəyannamənin tələblərinə uyğun olaraq yüksək səviyyəyə çatdırılıb. Qardaş Türkiyə ilə strateji müttəfiqlik münasibətləri, Gürcüstanla strateji tərəfdaşlığın bütün istiqamətlərini əhatə etməklə qarşılıqlı hörmətə söykənən əlaqələrimiz var. Bu kontekstdə İran-Azərbaycan münasibətlərinin də möhkəmləndirilməsi, daha yeni səviyyəyə yüksəldilməsi üçün addımların atılması Azərbaycan xarici siyasətinin prioritetlərindən biridir. İran Prezidentinin Azərbaycana səfəri bu baxımdan mühüm əhəmiyyət kəsb edir.
Bu fikirləri AZƏRTAC-a açıqlamasında Milli Məclisin deputatı Hikmət Babaoğlu söyləyib.
Deputatın sözlərinə görə, İran-Azərbaycan münasibətləri özünəməxsus spesifikası olan əlaqələrdir. Məsud Pezeşkianın səfəri zamanı keçirilən görüşdə hər iki qonşu ölkənin prezidentlərinin qeyd etdikləri kimi, bu münasibətlər ortaq tarixi keçmişə, ortaq mədəniyyətə, ortaq dil mədəniyyətinə söykənməklə bərabər, bu gün də dinamikdir. “Mənə elə gəlir ki, bütün bu reallıqların hamısı İran Prezidenti Məsud Pezeşkianın Azərbaycan Prezidentinə xitabında öz əksini tapıb. Çünki Məsud Pezeşkian Azərbaycan Prezidentinə “əziz qardaşım” deyə xitab etdi, dövlətimizin başçısı da iranlı həmkarına “əziz qardaşım” deyə müraciət etdi. Yəni, bu, sadəcə, gəlişigözəl sözlər, müraciətlər deyil. Bu, mövcud reallığın özüdür, tarixi, milli reallığın özüdür. Ona görə də düşünürəm ki, hazırkı mərhələdə məqsəd məhz İran-Azərbaycan münasibətlərini daha yüksək səviyyəyə qaldırmaqla bu sözün mənəvi haqqını real siyasi proseslərdə, real məzmuna qovuşdurmaqdır”, - deyə H.Babaoğlu vurğulayıb.
Ulu Öndər Heydər Əliyev tərəfindən əsasları qoyulan Azərbaycan-İran münasibətlərinin məhz yuxarıda söhbət açılan fəlsəfəyə söykəndiyini xatırladan parlamentari bildirib: “Bu fəlsəfə Azərbaycanın xarici siyasətində öz məntiqi davamına söykənməkdədir. Əlbəttə ki, İran-Azərbaycan münasibətlərinin də öz prinsipləri var. Heç şübhəsiz ki, bunlar, ilk növbədə, ərazi bütövlüyünün qarşılıqlı şəkildə tanınması, münasibətlərin inkişafına üçüncü ölkələrin müdaxiləsinin yolverilməzliyi, daxili işlərə qarışmamaq siyasətidir ki, bu da Azərbaycanın xarici siyasət kursunda öz əksini tapıb. Təsadüfi deyil ki, Azərbaycan Prezidenti 44 günlük müharibədən sonra - 2020-ci ildə Zəngilana səfər edərkən Xudafərin körpüsünə baxaraq onu “dostluq körpüsü” adlandırmışdı. Bu gün də Azərbaycan Prezidentinin siyasəti sayəsində və İranla münasibətlərimiz kontekstində artıq iki ölkənin əlaqələrində yeni körpü yaranmaqdadır. Bu, həm rəmzi məna daşıyan, həm də Araz dəhlizi vasitəsilə Azərbaycanı Naxçıvana birləşdirəcək körpüdür. Şübhəsiz ki, İran-Azərbaycan münasibətləri həm də mehriban qonşuluq prinsiplərinə, region dövlətlərinin qarşılıqlı inteqrasiyasına və yüksəksəviyyəli əməkdaşlığına söykənir. Bu mənada Azərbaycan və Türkiyənin irəli sürdüyü 3+3 formatı, onun perspektivləri İran-Azərbaycan münasibətlərinin cəzbedici tərəflərindən biridir. Eyni zamanda, daha böyük mənada Şimal-Cənub və Şərq-Qərb layihələri üzrə İranla Azərbaycanın çox böyük əməkdaşlıq imkanları var. Belə düşünmək olar ki, İran Prezidentinin Azərbaycana səfərindən sonra bütün istiqamətlərdə - humanitar, mədəni və mənəvi sahələrdə münasibətlərin dərinləşməsi, inkişafı üçün yeni şərtlər formalaşdı”.
Bölmənin digər xəbərləri
