İran vaqon istehsalını artırmaq niyyətindədir
Tehran, 6 aprel, AZƏRTAC
Ötən il İranın Ərak şəhərindəki “Vaqon Pars Ərak” zavodunda 300 sərnişin və yük vaqonu istehsal edilib.
AZƏRTAC xəbər verir ki, iqtisadi sanksiyalara baxmayaraq, zavod istehsalını nəinki dayandırmayıb, əksinə artırıb.
Zavodun baş direktoru Məhəmmədrza Möhtəri bildirib ki, İranda dəmir yolunun inkişafı və beynəlxalq nəqliyyat dəhlizlərinin ölkə ərazisindən keçməsi istehsalı artırmaq zərurətini yaradıb. Onun sözlərinə görə, “Şimal-Cənub” Beynəlxalq Nəqliyyat Dəhlizi vasitəsilə Asiyadan Avropaya yüklərin daşınması üçün vaqona böyük ehtiyac olacaq. Hindistandan və Cənub-Şərqi Asiyanın digər ölkələrindən yüklər gəmi vasitəsilə İrana gətiriləcək. İrandan isə qatarla Qəzvin-Rəşt-Astara(İran)-Astara(Azərbaycan) dəmir yolu xətti ilə Rusiya və Avropaya daşınacaq. Uzun yol qət edən qatarın vaqonları keyfiyyətli və müasir standartlara cavab vermək imkanında olmalıdır. Zavod bu tələbatı ödəməyə və yüklərə uyğun vaqon istehsal etmək iqtidarındadır.
Rabil Kətanov
AZƏRTAC-ın xüsusi müxbiri
Tehran
Bölmənin digər xəbərləri
