Tehran, 12 avqust (AZƏRTAC). Xəbər verdiyimiz kimi, avqustun 11-də İran İslam Respublikasının Şərqi Azərbaycan vilayətində baş vermiş zəlzələ ciddi dağıntı və fəlakətə səbəb olmuşdur. Dağıdıcı yeraltı təkanlardan 36 min nəfər zərər çəkmişdir. Onların əksəriyyəti evsiz qalmışdır. İndiyədək fəlakət bölgəsində 244 çadır quraşdırılmış, əraziyə 30 mindən çox çarpayı, ərzaq məhsulları, geyim əşyaları, zəruri dərmanlar və s. gətirilmişdir.

Yerli rəsmi mətbuatın son məlumatlarına görə, ölənlərin sayı 277 nəfərə çatmışdır. Tibbi yardım alanların sayı isə 1380 nəfərdən çoxdur. İtkin düşənlər barədə dəqiq məlumat yoxdur.

Xilasetmə işləri davam etdirilir. Zəlzələdən zərərçəkmişlərin zəruri məhsullarla təmin edilməsi məqsədi ilə yerli banklarda yardım hesabları açılmışdır.

Sabir Şahtaxtı

AZƏRTAC-ın xüsusi müxbiri

Tehran