Bakı, 9 yanvar, Gülay Nəzərova, AZƏRTAC

Qərbi Azərbaycan hər bir azərbaycanlı üçün təkcə bir coğrafi məkan deyil, həm də tarixin, mədəniyyətin və mənəvi dəyərlərin simvoludur. Bu zəngin irsin qorunması, gələcək nəsillərə ötürülməsi və Qərbi Azərbaycana qayıdış ideyasının reallığa çevrilməsi hər kəsi öz sahəsində bu prosesə töhfə verməyə sövq edir. Biz cəmiyyət olaraq ötən il ən müxtəlif platformalarda Qərbi Azərbaycan həqiqətlərinin diqqətə çəkilməsi ilə bağlı ciddi layihələrin, mötəbər tədbirlərin keçirilməsində hərəkətliliyin intensivləşməsinin şahidi olduq. Bu günlərdə Qərbi Azərbaycana qayıdış ideyasının reallığa çevrilməsi istiqamətində dövlətlə yanaşı, eyni zamanda, cəmiyyətin müxtəlif sahələrində də mühüm addımlar atılır. Sənət və mədəniyyət sahəsindəki fəaliyyətlər də bu istiqamətdəki önəmli layihələrdən biridir. Bir çox tanınmış sənətkarlarımız Qərbi Azərbaycanın zəngin mədəni irsini yaşatmaq, tanıtmaq və gələcək nəsillərə ötürmək üçün müxtəlif layihələr həyata keçirirlər. Onlar öz sənət əsərləri ilə bu məsələyə diqqət çəkərək, həm də Qərbi Azərbaycanın tarixi və mədəni dəyərlərinin qorunmasına mühüm töhfələr verirlər.

AZƏRTAC-ın müxbiri ilə həmsöhbət olan Azərbaycan Rəssamlar İttifaqının üzvü, araşdırmaçı tətbiqi sənət ustası İsgəndər Sərdarlı İrəvani Qərbi Azərbaycanın mədəni irsinin təbliği və bu irsin qorunması ilə bağlı Sərdarlı ailəsinin həyata keçirdiyi layihələrdən danışıb.

O bildirib ki, ərsəyə gətirdikləri əsərlər Qərbi Azərbaycanla bağlı xüsusi mənaya malikdir. Əsas məqsəd müasir dövrün ən yüksək sənət standartlarında bu qədim torpaqların mədəniyyətini yaşatmaq və dünya ictimaiyyətinə tanıtmaqdır. Qərbi Azərbaycanın zəngin mədəni irsinin yaşadılması və dünyaya tanıdılması hər birimizin mənəvi borcudur. Prezident İlham Əliyevin təşəbbüsü ilə Qərbi Azərbaycanla bağlı aparılan işlər intensivləşmiş, bu istiqamətdəki fəaliyyətlərin məqsəd və vəzifələri daha aydın şəkildə müəyyən olunmuşdur. Dövlətin irəli sürdüyü strategiya, yalnız mədəni irsin qorunmasına deyil, həm də Qərbi Azərbaycana qayıdış ideyasının reallığa çevrilməsinə xidmət edir. Odur ki, indi Qərbi Azərbaycan məsələsinin müxtəlif platformalarda təzahür etməsi, gündəm olması düşünülmüş, əsası bütün beynəlxalq hüquq normalarına söykənmiş, ədalətli siyasətin məntiqi nəticəsidir.

Sənətkar, Sərdarlı ailəsinin qurucusu olduğu “Tətbiqi Sənət Nümunələrinin Qorunmasına və Təbliğinə Yardım” İctimai Birliyinin fəaliyyəti barədə danışarkən, bu təşkilatın Qərbi Azərbaycandakı tarixi memarlıq abidələrini və mədəni irs nümunələrini qorunması məqsədilə həyata keçirdiyi mühüm layihələrdən bəhs edib: “Təşkilat, Qərbi Azərbaycan bölgəsində məhv olmuş və ya dağıdılmış sənət əsərləri, memarlıq abidələri və tarixi məkanlar haqqında məlumatları toplayaraq, bu məlumatları müxtəlif mühazirələr, sərgilər və nəşrlərlə geniş ictimaiyyətə çatdırmağa çalışır. Həmçinin ölkəmizdə Qərbi Azərbaycanla bağlı keçirilən beynəlxalq tədbirlərdən birinə qatılan sonuncu İrəvan Xanlığının varisi Əmir Əli Sərdari İrəvani, Sərdarlı sənətkar ailəsinin qurduğu Sərdar Sandıq Ocağını da ziyarət etdi. O da, mən də Qərbi Azərbaycandan, doğma İrəvandan tarixdə ilk dəfə məcburən köç edən böyük nəsillərin təmsilçiləriyik. Uzun müddətdir Əmir Əli Sərdari İrəvani Təbriz, Naxçıvan, Qarabağ, Gəncə kimi ayrılmaz parçamız olan İrəvan Xanlığının şanlı tarixi, irsi haqqında apardığı qiymətli araşdırma, tədqiqat materiallarının nəticələrini bütün mümkün platformalarda yaymaqla dünyaya tanıtmaqla məşğuldur”.

İsgəndər Sərdarlının sözlərinə görə, Qərbi Azərbaycanın adət-ənənələrini özündə əks etdirən əsərlərin toplandığı Sərdar Sandıq Ocağının ötən il yaradılmasının 3 ili tamam olub. Bura, həmçinin Qərbi Azərbaycan mədəniyyətinin, tarixinin və insanlığa töhfə vermiş sənət incilərinin təbliğinə xidmət edən bir məkandır. Müxtəlif ölkələrdən gələn diplomatik nümayəndələr, sənətkarlar, alimlər və ictimai xadimlər bu ocağı ziyarət edərək yeni bilik və məlumatlar əldə edirlər. Qərbi Azərbaycanda zamanında xüsusi vandallıqla ermənilər tərəfindən məhv edilmiş tarixi memarlıq abidələri, insanlığa faydalı ola biləcək əsl sənət əsərləri haqqında əldə edilən məlumatlar həmin məkanda sərgilənir. Bu yalnız Qərbi Azərbaycan mədəniyyətinin təbliği ilə bağlı deyil, həm də bu dəyərli irsin gələcək nəsillərə ötürülməsinin təmin edilməsi istiqamətində mühüm addımlardır.