İsrail əmək və əhalinin sosial müdafiəsi sahəsində Azərbaycan ilə uğurlu əməkdaşlıq etməyi qarşıya məqsəd qoymuşdur
Bakı, 5 mart (AZƏRTAC). Yəhudi Xəbərlər Agentliyi (YXA) oxucularına İsrailin Azərbaycandakı səfiri Rafael Harpazın Azərbaycan Respublikasının əmək və əhalinin sosial müdafiəsi naziri Səlim Müslümov ilə görüşü haqqında məlumat vermişdir.
Materialda qeyd edilir ki, görüş zamanı səfir Rafael Harpaz demişdir: “İsrail əmək və əhalinin sosial müdafiəsi sahəsində Azərbaycan ilə uğurlu əməkdaşlıq etməyi qarşıya məqsəd qoymuşdur”.
Nazir Səlim Müslümov müzakirə edilən mövzu kontekstində səfir Rafael Harpazı respublikanın yəhudi icması üzvlərinin də cəlb olunduqları Azərbaycan iqtisadiyyatının inkişaf dinamikası, eləcə də yəhudilərin sosial müdafiəsinin səviyyəsi barəsində məlumatlandırmışdır.
Səlim Müslümovun sözlərinə görə, son on ildə Azərbaycanın ümumi daxili məhsulu 3,2 dəfə, o cümlədən qeyri-neft sektorunda 2,6 dəfə, əhalinin gəlirləri 6,5 dəfə, orta aylıq əməkhaqqı 5,5 dəfə artmış, investisiyaların həcmi 6,5 dəfə genişlənmişdir.
Nazir Səlim Müslümov onu da qeyd etmişdir ki, son on ildə Prezident İlham Əliyevin həyata keçirdiyi iqtisadi və sosial siyasət nəticəsində Azərbaycanda 55,6 min müəssisə, 1,2 milyondan artıq yeni iş yerləri, o cümlədən 900 min daimi iş yeri yaradılmış, işsizliyin səviyyəsi beş faizədək, yoxsulluğun səviyyəsi isə 5,3 faizədək azalmışdır.
Məqalənin tam mətni ilə http://aen.ru/?page=brief&article_id=69990 linkində tanış olmaq mümkündür.
Bölmənin digər xəbərləri
