İsveçin “Diplomatic World Sweden” internet nəşrində Novruz bayramı ilə bağlı məqalə dərc olunub
Stokholm, 21 mart, Nərgiz Cəfərli, AZƏRTAC
İsveçin “Diplomatic World Sweden” internet nəşrində Novruz bayramı ilə bağlı məqalə yayımlanıb.
AZƏRTAC xəbər verir ki, adı “Yeni gün” kimi tərcümə olunan Novruz qədim tarixə malikdir və təxminən 3500-5000 il əvvələ gedib çıxır. Məqalədə vurğulanır ki, Novruz min illərdir ki, qədim Babildən Qafqaza qədər Asiyanın müxtəlif bölgələrində geniş şəkildə qeyd olunur. Hətta sovet dövründə də rəsmi qadağalara baxmayaraq, azərbaycanlılar öz adət-ənənələrini qoruyub saxlayaraq, bayramı qeyd ediblər.
Nəşrdə Novruz bayramına hazırlıq prosesi ətraflı təsvir olunur: bayramdan əvvəl ay ərzində hər biri ünsürlərdən birinə - su, külək, od və torpağa həsr olunan dörd rəmzi “çərşənbə” qeyd olunur. Bu mərasimlərdə mərkəzi rol oynayan oda xüsusi diqqət yetirilir.
Məqalədə, həmçinin xalq oyunlarından, şəhərlərdə keçirilən mədəni-kütləvi tədbirlərdən və Bakıda Qız qalasının yanında təşkil olunan əsas şənliklərdən bəhs edilir.
Sonda xatırladılır ki, 2009-cu ildə Novruz UNESCO-nun Bəşəriyyətin Qeyri-Maddi Mədəni İrsinin Reprezentativ Siyahısına daxil edilib.
Qeyd edək ki, “Diplomatic World Sweden” nəşri İsveçdə çalışan diplomatlar, siyasətçilər, o cümlədən diplomatik nümayəndəliklərin və səfirliklərin əməkdaşları üçün nəzərdə tutulub.
Bölmənin digər xəbərləri
