Roma, 19 aprel, AZƏRTAC

İtaliyada orqan donorluğu ötən bir il ərzində 3 faiz artıb, razılıq səviyyəsi 68,9 faizə çataraq rekord göstəriciyə yüksəlib.

AZƏRTAC xəbər verir ki, İtaliyanın ən yaxşı nəticəyə malik bələdiyyəsi isə 1800 əhalisi olan Palermo kəndidir.

İtaliya Milli Transplantasiya Mərkəzinin məlumatına görə, ötən il orqan və toxuma donorluğuna hazır olduqlarına dair bəyannamə təqdim edənlərin sayı 6845 olub. Bu günədək isə informasiya sistemində təqdim edilən bəyannamələrin sayı 12,7 milyondur ki, onların 9,2 milyonu “hə”, 3,5 milyonu isə “yox” cavabı ilə verilib.

Hazırda ölkədə gözləmə siyahısında 8500-dək insan var. Keçən il 1725 orqan donoru sayəsində 3778 transplantasiya həyata keçirilib.

Nihad Budaqov

AZƏRTAC-ın xüsusi müxbiri

Roma