İyunun 30-da Bakı şəhərinin Nəsimi, Xətai, Nərimanov, Yasamal, Səbail, Binəqədi, Suraxanı rayonlarında kənd təsərrüfatı məhsullarının növbəti satış-yarmarkaları keçirilmişdir. Ümumiyyətlə, indiyədək keçirilmiş yarmarkalarda istehlakçılara 17 min tondan çox məhsul, 7 milyon ədəddən artıq yumurta satılmışdır.

Şənbə günü kənd təsərrüfatı məhsullarının satışının təşkil edildiyi bütün yarmarkalarda - “Təzə bazar” MMC-nin həyətində, metronun “Əhmədli” stansiyasının yaxınlığında, “Bakı” kinoteatrının yanındakı “Azər” ticarət mərkəzində, Keşlə ticarət mərkəzində, metronun “İnşaatçılar” stansiyasının yaxınlığında, Badamdar, Biləcəri qəsəbələrində, “Bolluq” bazarının yanında, Qaraçuxur qəsəbəsindəki “Günəş” ticarət mərkəzində, Əmircan qəsəbəsindəki “Suraxanı Maşınqayırma Zavodu” Açıq Törəmə Səhmdar Cəmiyyətinin ərazisində əhaliyə respublikanın 42 rayonundan gətirilmiş 200 ton meyvə-tərəvəz, 200 min ədəd yumurta, 7 ton mal və quş əti satılmışdır.

Sabirabad, Salyan, Samux, Balakən, Kürdəmir, Quba, Cəlilabad, Gədəbəy, Tovuz, Şəmkir, Şəki, Ağcabədi, Qəbələ, Qazax, Xaçmaz, Astara, Qobustan, Hacıqabul və digər rayonlardan gəlmiş fermerlər onlar üçün yaradılmış şəraitdən razılıq edirdilər. “Təzə bazar” MMC-nin həyətində alıcıların xidmətində dayanan Sabirabad rayonunun Suqovuşan kəndindən gəlmiş Məmməd Əliyev paytaxt sakinlərinə özlərinin yetişdirdikləri kənd təsərrüfatı məhsullarını təklif etdiklərini bildirdi. Qeyd etdi ki, yarmarkada alıcılara nümunəvi xidmət göstərmək üçün hər cür şərait yaradılmışdır. M.Əliyev belə rahat şərait yaradıldığına görə təşkilatçılara minnətdarlıq etdi.

Fermerlər mal, qoyun ətini, kartofu, meyvəni, ağartını, konserv məhsullarını, bal və yumurtanı, mövsümi tərəvəzi - soğan, lobya, badımcan və pomidoru paytaxt sakinlərinə bazardakından xeyli ucuz qiymətə satırdılar. Yarmarkalarda məhsulların çeşidinə görə qiymətləri tez-tez aşağı düşür. Bu isə alıcıların ürəyincədir. Badamdar qəsəbəsində Faiq Qarayev, Sona Kərimova və başqa alıcılar yarmarkanın təşkilatçılarına minnətdarlıqlarını bildirməklə bərabər, məhsulların qiymətindən və keyfiyyətindən razılıq edirdilər.

Kənd Təsərrüfatı Nazirliyinin, paytaxt rayonları icra hakimiyyətlərinin nümayəndələri yarmarkalarda satışın təşkilinə, məhsulların keyfiyyətinə və qiymətinə ciddi nəzarət edirdilər.