KANADADA 28 MAY –RESPUBLİKA GÜNÜ MÜNASİBƏTİLƏ TƏDBİRLƏR KEÇİRİLMİŞDİR
Azərbaycanın Kanadadakı səfirliyindən AZƏRTAC-a bildirmişlər ki, mayın 28-də Kanadanın Ottava şəhərində Azərbaycan Respublikası günü qeyd edilmişdir. Şəhərin meri Larry O’Brein 90 il əvvəl qadınlar və kişilər üçün bərabər səs hüququ verən, Şərqdə ilk dünyəvi demokratik müsəlman dövlətinin yaranmasını bildirmişdir. Mer demişdir ki, hər il dünyada təqribən 50 milyon azərbaycanlı 28 mayı Respublika günü kimi qeyd edir.
Həmin gün şəhər bələdiyyəsinin qarşısında Azərbaycan bayrağının qaldırılması mərasimi keçirilmişdir. Azərbaycan icmasının nümayəndələri, dəvət olunmuş kanadalı qonaqlar, Azərbaycan səfirliyinin əməkdaşları və başqaları tədbirdə iştirak etmişlər.
Müvəqqəti işlər vəkili F.Şəfiyev, Azərbaycan icmasının üzvü Yaşar Muğan və başqaları mərasimdə çıxış edərək Azərbaycan Xalq Cümhuriyyətinin tarixindən danışmış, bu günün hər bir azərbaycanlı üçün mühümlüyünü, hazırda Azərbaycanın fəal xarici siyasət apardığını və məqsədyönlü siyasət nəticəsində regional liderə çevrilərək dövlətimizin beynəlxalq aləmdə öz nüfuzunu möhkəmlətdiyini vurğulamışlar.
Axşam isə səfirlik tərəfindən Respublika Günü münasibətilə rəsmi qəbul təşkil edilmişdir. Qəbulda Kanada dövlət orqanlarının, Senat və Nümayəndələr Palatasının üzvləri, diplomatik korpus, KİV və Azərbaycan icmasının nümayəndələri iştirak etmişlər.
Bölmənin digər xəbərləri
