KƏND TƏSƏRRÜFATINDA AŞAĞI KEYFİYYƏTLİ SULARIN İSTİFADƏSİNƏ HƏSR OLUNMUŞ SEMİNAR KEÇİRİLMİŞDİR
Bakı, 21 iyun (AZƏRTAC). İyulun 21-də İslam İnkişaf Bankının İslam maliyyəçiliyinə dair 5-ci Qlobal Forumu çərçivəsində kənd təsərrüfatında aşağı keyfiyyətli suların istifadəsi, şoran torpaqlarda yeni texnologiyaların tətbiqi ilə kənd təsərrüfatının inkişafı, su mənbələrinin təhlükəsizliyi, bu sahədə beynəlxalq təcrübənin öyrənilməsi və digər məsələlərə dair seminar keçirilmişdir.
İslam İnkişaf Bankının (İİB) vitse-prezidenti Birama Sidebe İİB-in kənd təsərrüfatı sahəsində həyata keçirdiyi işlərdən danışaraq, qurumun son illərdə su mənbələrinin mühafizəsi sahəsində layihələrə böyük diqqət ayırdığını söyləmişdir. Qeyd etmişdir ki, bu məqsədlə 11 il əvvəl baş ofisi Dubayda yerləşən Şorlaşmış Torpaqlarda Kənd Təsərrüfatının İnkişafı üzrə Beynəlxalq Mərkəz (İCBA) yaradılmışdır. Bu mərkəz sudan korluq çəkən ölkələrdə kənd təsərrüfatında məhsuldarlığın artırılması məqsədi ilə bir sıra layihələr keçirir. Bu gün tükənməkdə olan şirin su ehtiyatlarından qənaətlə istifadə etmək üçün milli və beynəlxalq səviyyədə əməkdaşlıq vacibdir.
B.Sidebe İİB-in layihələrinə maraq göstərdiyi və fəal əməkdaşlıq etdiyi üçün Azərbaycan hökumətinə minnətdarlığını bildirmişdir.
Azərbaycan Aqrar Elm Mərkəzinin baş direktoru Əsəd Musayev Azərbaycanda şoran torpaqlardakı vəziyyətə toxunaraq demişdir ki, bu ərazilərdə zəruri tədbirlər görülməlidir. Bu məqsədlə İCBA ölkəmizdə kənd təsərrüfatında məhsuldarlığı artırmaq üçün layihələr həyata keçirmək niyyətindədir.
Ə.Musayev Azərbaycanın son 15 ildə Quraq Ərazilərdə Kənd Təsərrüfatı Tədqiqatları üzrə Beynəlxalq Mərkəz (ICARDA) ilə sıx əlaqələrin qurulduğunu xatırladaraq İCBA ilə əməkdaşlığın səmərəli olacağına inandığını vurğulamışdır.
İCBA-nın texniki proqramlar üzrə direktoru Faysal Taha isə qurumun müxtəlif ölkələrdə fəaliyyətindən danışaraq mərkəzin əsasən susuzluqdan əziyyət çəkən ölkələrdə kənd təsərrüfatı sistemində sudan düzgün istifadənin tənzimlənməsi kimi layihələr həyata keçirdiyini söyləmişdir. Azərbaycanda kənd təsərrüfatı məhsullarının istehsalı üçün böyük potensialın olduğunu deyən Faysal Taha ölkəmizlə əməkdaşlıqdan yalnız məmnun qalacağını bildirmişdir.
Bölmənin digər xəbərləri
