Bakı, 17 oktyabr (AZƏRTAC). Xalqımızın ümummilli lideri Heydər Əliyevin 90 illik yubileyinə həsr edilmiş kikboksinq üzrə Azərbaycan - Cənubi Afrika Respublikası (CAR) turniri Afrika qitəsi və Asiyada yayımlanan, 500 milyona yaxın auditoriyası olan “Super Sport” televiziya kanalı tərəfindən lentə alınaraq yerli televiziya kanalları və mətbuat tərəfindən geniş işıqlandırılmışdır.

Oktyabrın 15-dən etibarən CAR-ın paytaxtı Pretoriyada keçirilmiş turnirin 26 dəqiqəlik videoyazısı “Super Sport” kanalı tərəfindən bir həftə ərzində davamlı olaraq yayımlanmaqdadır. Video, həmçinin YouTube və “Azərbaycanın Dostları” təşkilatının internet səhifəsində yerləşdirilmişdir. Həmin videogörüntünü YouTube və Facebookda http://www.youtube.com/watch?v=FalokjjekUs&feature=youtu.be https://www.facebook.com/friendsofazerbaijanZA?ref=ts&fref=ts linklərindən izləmək mümkündür.

Bu barədə AZƏRTAC-a Azərbaycan Respublikasının Cənubi Afrika Respublikasındakı səfirliyindən məlumat verilmişdir.

Qeyd edək ki, Azərbaycanın bu ölkədəki səfirliyi, Azərbaycan Kikboksinq Federasiyası və CAR-ın Həvəskar Kikboksing Assosiasiyasının təşkilatçılığı ilə avqustun 30-da keçirilmiş turnir çərçivəsində hər iki ölkədən 20 idmançının iştirakı ilə müxtəlif çəkilərdə lou-kik və K-1 üsulları üzrə 10 döyüş olmuşdu.

Yığmamızın döyüşçüləri öz rəqiblərinə qalib gələrək Azərbaycan kikboksing məktəbinin dünyada ən aparıcı məktəblər sıralarında olduğunu bir daha sübut etmişdilər. Nəticə etibarı ilə Azərbaycan yığması 8, CAR yığması isə 2 qələbə ilə turniri başa vurmuşdu.

Sonda isə hər iki komandanın döyüşçüləri üzərində turnirin loqosu olan maykalarını və hədiyyələrini dəyişmişdilər.