Kişineuda Avropa audiovizual media tənzimləyicilərinin platforması olan EPRA-nın 61-ci Toplantısı keçirilib
Bakı, 16 may, AZƏRTAC
Moldovanın paytaxtı Kişineu şəhərində Tənzimləyici Orqanların Avropa Platformasının (EPRA) 61-ci Toplantısı keçirilib. Azərbaycan Respublikası Audiovizual Şurasını toplantıda Şura Aparatının rəhbəri Fazil Novruzov və Kommunikasiya sektorunun müdiri Taleh Quliyev təmsil ediblər.
AZƏRTAC xəbər verir ki, toplantının açılışında Moldova Respublikasının Prezidenti Maya Sandu Avropa məkanında audiovizual media sahəsini tənzimləyən qurumların əməkdaşlıq və dialoq imkanlarının genişləndirilməsi, mütərəqqi təcrübələrin öyrənilməsi baxımından EPRA-nın fəaliyyətini yüksək qiymətləndirib, tədbirin işinə uğurlar arzulayıb.
“Fakta əsaslanan tənzimləmə” və “Onlayn mühitdə uşaqların müdafiəsi” mövzularına həsr edilən ilk iclasda EPRA-nın hazırkı sədri, Norveç media tənzimləyici qurumunun rəhbəri Mari Velsand təşkilatın ötən dövr ərzində gördüyü işlər barədə məlumat verib, maliyyə hesabatını təqdim edib.
Qeyd edək ki, Avropanın ən nüfuzlu audiovizual media tənzimləyicilərinin şəbəkəsi olan EPRA-nın bu Toplantısına 48 Avropa dövlətindən 50 audiovizual media üzrə tənzimləyici orqanın rəhbərləri və nümayəndələri, həmçinin Avropa Komissiyasının, ATƏT Media Bürosunun, Avropa Şurası Media Bölümünün, Avropa Audiovizual Observatoriyasının müşahidəçiləri, habelə UNESCO-nun, “Meta”, “Cullen International” şirkətlərinin ekspertləri daxil olmaqla 150-dən çox nümayəndə və ekspert qatılıb.
Toplantı zamanı “Onlayn mühitdə uşaqların müdafiəsi”, "Media savadlılığı", "Tənzimləyicilər üçün yeni çağırışlar", “Videopaylaşım və sosial şəbəkə platformaları, onların təsiri” mövzularında çıxışlar edilib. Həmçinin tədbir çərçivəsində “Audiovizual media xidmətlərində alətlər və yanaşmalar” və “Media savadlılığı və hüquqlar” mövzularında panel sessiyalar təşkil olunub.
Toplantının ikinci günündə platformanın idarə heyətinə sədr və sədr müavinləri postlarına seçkilər keçirilib. Səsvermənin sonunda İrlandiya yayım tənzimləyici orqanının rəhbəri Stefani Komey növbəti ikiillik müddətə EPRA sədri seçilib. Həmçinin Böyük Britaniyanın, Rumıniyanın, Monteneqro və Slovakiyanın tənzimləyici orqanlarının nümayəndələri sədr müavinləri seçiliblər.
Bölmənin digər xəbərləri
