Bakı, 29 iyul (AZƏRTAC). Oktyabrın 25-26-da Azərbaycan Müəllimlər İnstitutunun (AMİ) təşkilatçılığı ilə “Tarixi-mədəni irsin tədqiqi, təbliği, mühafizəsi və diyarşünaslıq işinin təşkilində təhsil müəssisələrinin rolu” mövzusunda respublika konfransı keçiriləcəkdir.

AMİ-dən AZƏRTAC-a bildirmişlər ki, konfransın məqsədi Azərbaycan ərazisindəki çoxsaylı tarix və mədəniyyət abidələrinin hazırkı vəziyyəti, onların tədqiqi, təbliği və mühafizəsində aidiyyəti qurumların, xüsusən də təhsil müəssisələrinin, geniş ictimaiyyətin iştirakı məsələlərinə diqqəti cəlb etmək, beləliklə də yetişməkdə olan nəslin Vətənə, tarixi-mədəni dəyərlərə məhəbbət ruhunda tərbiyə olunmasına kömək göstərməkdir.

Məruzə və poster formatında keçiriləcək konfransın işində elmi-tədqiqat müəssisələri, ali və ümumtəhsil məktəblərinin nümayəndələri, dövlət və bələdiyyə qurumlarının təmsilçiləri, bu sahəyə maraq göstərən şəxslər iştirak edə bilərlər.

Tədbirdə “Tarixi-mədəni dəyərlərin mövcud vəziyyəti”, “Memarlıq və arxeoloji abidələrin öyrənilmə dərəcəsi”, “Təsadüfi tapıntıların qeydiyyata alınması və onların ictimailəşdirilməsi sahəsində pedaqoji ictimaiyyətin rolu”, “Tarix və mədəniyyət abidələrinin mühafizəsi: problemlər və vəzifələr”, “Tarixi-mədəni irsin təbliği: reallıqlar və perspektivlər”, “Məktəb muzeyləri və diyarşünaslıq işinin təşkilində təhsil müəssisələrinin rolu”, “Tarixi-mədəni irsin informasiya təminatı” mövzuları müzakirə ediləcəkdir.

Maraqlananlar tezisləri oktyabrın 1-dək, məruzələrin mətnini isə oktyabrın 20-dək konfransın təşkilat komitəsinə göndərməlidirlər. Ünvan: Azərbaycan Müəllimlər İnstitutu. Akademik Həsən Əliyev küçəsi, 104. Telefon: +99412 4650318 (İctimai fənlər kafedrası). E-mail: [email protected].

Ətraflı məlumatı AMİ-nin www.ami.az rəsmi internet səhifəsindən əldə etmək olar.