KOREYA TİCARƏT VƏ İNVESTİSİYALARIN TƏŞVİQİ AGENTLİYİNİN BAKIDA OFİSİ AÇILMIŞDIR
AZƏRTAC xəbər verir ki, mayın 19-da “Kermur Plaza” Biznes Mərkəzində Koreya Respublikası Ticarət və İnvestisiyaların Təşviqi Agentliyinin (KOTRA) Bakı ofisinin açılışı olmuşdur.
Tədbirdə KOTRA-nın xarici investisiyalar üzrə vitse-prezidenti Kyungsun Min və ölkənin iqtisadiyyat bilgiləri nazirinin müavini Li Cey Hun çıxış etmişlər. Bildirilmişdir ki, 1962-ci ildə yaradılmış KOTRA ölkədə ixracyönümlü iqtisadiyyatın tez bir zamanda inkişafına təkan vermişdir. Dövlət təşkilatı olan KOTRA hazırda yüzdən çox xarici nümayəndəlikdən ibarət qlobal təşviqat şəbəkəsinə malikdir.Təşkilatın əsas vəzifələri ticarət və investisiyalara yardım, xarici bazarların öyrənilməsi və biznes tərəfdaşlarının axtarılmasından ibarətdir.
KOTRA-nın Bakı ofisi Azərbaycan iş adamları üçün Koreya şirkətləri ilə biznes danışıqların təşkilinə, Azərbaycanda maraqlarını təmsil etmək səlahiyyətini bu təşkilata həvalə etmiş Koreya şirkətləri ilə tərəfdaşlıq münasibətlərinin qurulmasına yardım edəcək, Koreya Respublikasında keçirilən müxtəlif sərgilərdə və ticarət missiyalarında iştirak etmək niyyətində olan Azərbaycan şirkətlərinə hərtərəfli dəstək verəcəkdir.
Çıxışlarda Koreya Respublikasının Prezidenti Ro Mu Hyunun 2006-cı il mayın 10-12-də Azərbaycana rəsmi səfərinin, Azərbaycan Prezidenti İlham Əliyevin 2007-ci il aprelin 23-25-də Koreya Respublikasına dövlət səfərinin ölkələrimiz arasında əlaqələrin genişlənməsinə və iqtisadi əməkdaşlığın inkişafına böyük təkan verdiyi vurğulanmışdır. 2006-cı ildə ölkələrimiz arasında ticarət dövriyyəsi 32 milyon dollar təşkil edirdisə, bu gün həmin rəqəm 465 milyon dollara çatmışdır. Əməkdaşlığımızın nəticəsi olaraq Koreya Respublikasının 14 şirkəti Bakıda öz ofisini açmışdır. Bununla belə, tikinti, infrastruktur, telekommunikasiya kimi qeyri-neft sahələrində, enerji sektorunda əməkdaşlığı artırmaq üçün böyük potensial vardır. KOTRA-nın Bakı ofisi fəaliyyətini bu istiqamətdə quracaqdır.
Azərbaycanda İxracın və İnvestisiyaların Təşviqi Fondunun (AZPROMO) prezidenti Emil Məcidov rəhbərlik etdiyi qurumun KOTRA ilə son iki ildə əməkdaşlığından danışmış, gələcəkdə bu əməkdaşlığın daha da genişlənəcəyinə əminliyini bildirmişdir.
Sonra təşkilatın lövhəsinin açılışı olmuş və xatirə şəkli çəkdirilmişdir.
İştirakçılar KOTRA-nın ofisi ilə tanış olmuşlar.
Sonra KOTRA-nın xarici investisiyalar üzrə vitse-prezidenti Kyungsun Min və AZPROMO-nun prezidenti Emil Məcidovun iştirakı ilə mətbuat konfransı keçirilmiş, KİV nümayəndələrinin sualları cavablandırılmışdır.
######
Bölmənin digər xəbərləri
