LAÇINLILAR ŞƏHİDLƏR XİYABANINDA ANMA MƏRASİMİ KEÇİRMİŞLƏR
AZƏRTAC xəbər verir ki, mayın 18-də - Laçının Ermənistan silahlı qüvvələri tərəfindən işğalının 16-cı ildönümü ilə əlaqədar Şəhidlər xiyabanında anma mərasimi keçirilmişdir.
Əvvəlcə şəhidlərin ruhuna dua oxunmuşdur.
Prezidentin İcra Aparatının məsul əməkdaşı Rövşən Ağayev, Laçın Rayon İcra hakimiyyətinin başçısı Ramiz Cəbrayılov, Milli Məclisin deputatları Sevindik Hətəmov, Məlahət Həsənova, Fərhad Qəribov, Bakı və Sumqayıt şəhərlərində, Abşeron rayonunda məskunlaşmış yüzlərlə laçınlı, rayon ictimaiyyətinin nümayəndələri, tələbə və məktəblilər, Qarabağ müharibəsi əlilləri və veteranları, şəhid ailələri torpaqlarımızın azadlığı uğrunda həlak olmuş Vətən oğullarının xatirəsini ehtiramla anmış, məzarları üstünə güllər düzmüş, “Əbədi məşəl” abidə kompleksinin önünə əklil qoymuşlar.
Burada dəfn olunmuş Laçın şəhidlərinin, o cümlədən Milli Qəhrəmanlar İsrafil Şahverdiyevin və Oqtay Güləliyevin məzarları üzərinə qərənfillər düzülmüşdür.
Anma mərasimi “Fəridə” sarayında açılmış süfrə arxasında davam etdirilmişdir.
######
