Macarıstan çempionu olan azərbaycanlı voleybolçu: Şükürlər olsun ki, illərlə çəkdiyim əziyyət boşa getməyib - MÜSAHİBƏ
Bakı, 30 aprel, AZƏRTAC
- “Vaşaş” komandasının heyətində Macarıstan çempionu olan Azərbaycan millisinin voleybolçusu Ayşən Abduləzimova AZƏRTAC-ın suallarını cavablandırıb. Həmin müsahibəni təqdim edirik:
- Hazırkı komandanızla beşinci dəfə Macarıstan çempionu oldunuz. Təəssüratlarınız necədir?
- Hər il olduğu kimi, bu il də qarşımıza qoyulan hədəflərə çatdıq. Ümumiyyətlə, mövsüm çox sıx qrafiklə davam etdi. Liqa ilə yanaşı, Macarıstan Kuboku, Çempionlar Liqası, CEV Kuboku, həmçinin MEVZA Superkuboku yarışlarında mübarizə apardıq. Gərgin və sıx qrafikə baxmayaraq, ən yaxşı şəkildə çıxış etməyə çalışdıq. Düşünürəm ki, buna da nail olduq. Macarıstan Kuboku ilə MEVZA Superkubokunda qızıl medal qazandıq, Çempionlar Liqasında pley-offa yüksəldik, daha sonra CEV Kubokunda 3-cü yeri tutduq. Macarıstan çempionatında isə final üç qələbəyədək davam edirdi. Biz də elə ilk üç oyunda qalib gələrək, seriyanın uzanmasına imkan vermədik və növbəti dəfə çempion olduq. Bu münasibətlə komandamı bir daha təbrik edirəm.
- Ölkə xaricində karyeranız kifayət qədər uğurlu alındı. Bunun səbəbini nədə görürsünüz?
- Harada olmağımdan asılı olmayaraq, çalışmışam ki, yüksək səviyyədə çıxış edim. Xaricdə olduğum bu illərdə özümü yaxşı tərəfdən göstərməklə yanaşı, ölkəmizi də layiqli təmsil etmək üçün əlimdən gələni etmişəm. Çox şadam ki, Avropada oynadığım hər mövsümdə uğurlu nəticələr əldə etmişəm. Çünki hər legioner idmançının adının yanında onun öz ölkəsinin bayrağı qeyd edilir. İstər komanda şəklində, istərsə də fərdi nailiyyətlərimi qazandığım zaman Azərbaycanın da adının çəkilməsinə səbəb olduğum üçün xoşbəxtəm. Bundan sonra da ölkəmizi layiqincə təmsil edəcəyəm.
- Avropada bu qədər titul qazanacağınızı gözləyirdiniz?
- Dediyim kimi, mən hər zaman yaxşı səviyyədə oynamaq üçün çalışmışam. Əlbəttə, çempion olmaq, avrokuboklarda, beynəlxalq yarışlarda titul qazanmaq hər bir idmançının əsas məqsədidir. Mən də yaxşı oynamaqla bərabər, hər mövsüm Vətənə medalla qayıtmaq üçün əlimdən gələni etmişəm. Bilirsiniz ki, voleybol komanda idman növüdür. Bütün bu nəticələri mən tək yox, komanda yoldaşlarımın, məşqçilərimizin köməyi ilə qazanmışam.
- 2018-ci ildən karyeranızı ölkə xaricində davam etdirirsiniz. İndiyədək olan fəaliyyətinizi necə dəyərləndirirsiniz?
- Bəli, uzun illərdir ölkə xaricində çıxış edirəm. Deyə bilərəm ki, karyeramda həm komanda, həm fərdi şəkildə ən çox titulu məhz Macarıstanda qazanmışam. Həmçinin avrokuboklarda ən çox oyunu da “Vaşaş”ın heyətində keçirmişəm. Şükürlər olsun ki, illərlə çəkdiyim əziyyət, zəhmət boşa getməyib. İstər liqada, istərsə də avrokuboklarda uğurla çıxış edirəm.
- Bu illər ərzində Azərbaycan üçün darıxdığınızı hiss etmisiniz? Məsələn, bəzi azərbaycanlı futbolçular ölkə xaricində bu qədər çox qala bilmirlər...
- Mövsüm kifayət qədər sıx qrafiklə keçdiyindən darıxmağa çox da vaxt olmur. Amma bununla belə, insan öz ailəsindən, ölkəsindən kənarda olanda darıxır. Ən çox ailəm, dostlarım və milli yeməklərimiz üçün darıxıram.
- Avropada uzun müddət oynayan voleybolçu kimi, azərbaycanlı qızlara legioner həyatı yaşamaq barədə nələri tövsiyə edərdiniz?
- Öz vətənində oynamaq həmişə rahatdır. Həm dil, həm də mentalitet barədə çətinlik olmur. Adamın ailəsi, dostları da yanında olur. Nə qədər yaxşı ölkədə oynasan da, sənə yaxşı davransalar da, yenə də orada əcnəbi sayılırsan və bütün yük sənin üstünə düşür. Bu, nə qədər çətin olsa da, həm də çox qürurlu haldır və ən əsası, bir voleybolçuya böyük təcrübə qazandırır. Fikrimcə, hamı karyerasında bir dəfə də olsa, bu təcrübəni yaşamalıdır. Legioner həyatı yaşamaq istəyən gənc oyunçularımıza deyə bilərəm ki, ilk növbədə yaxşı oynamağa, təcrübə yığmağa çalışsınlar.
- Daha neçə il ölkə xaricində oynamağı düşünürsünüz?
- Bilirsiniz ki, mövsüm yeni bitib. Hələ bu barədə qərar verməmişəm. Gələn təkliflərin hamısına baxıb, sonra dəyərləndirəcəyəm.
- Azərbaycan millisi bu il Avropa Qızıl Liqasında mübarizə aparacaq. Şansları necə qiymətləndirirsiniz?
- Artıq may ayının sonlarında ilk oyunlar olacaq. Hər zaman olduğu kimi yaxşı oynayıb, uğurlu nəticələr qazanmağa çalışacağıq. Növbəti mərhələlərə vəsiqə qazanmaq üçün əlimizdən gələni edəcəyik.
- Ölkə voleybolunun hazırkı durumu haqqında nə söyləyə bilərsiniz?
- Azərbaycan voleybolunun hazırkı vəziyyəti ilə bağlı deyə bilərəm ki, son illər bir sıra işlər həyata keçirilir və yaxın vaxtlarda bunların müsbət nəticəsini görəcəyimizə əminəm.
- Yüksək Liqanın oyunlarını izləyirsiniz? Ümumiyyətlə, sizin çıxış etdiyiniz dövrdən sonra liqamızda nələr dəyişib?
- İmkan tapdıqca, Azərbaycan çempionatını izləyirəm. Bir neçə il əvvəl çempionat zəif olsa da, son illərdə güclənib. İldən-ilə səviyyəli legioner oyunçuların sayı artır, matçların və çempionatın səviyyəsi yüksəlir. Bu isə məni çox sevindirir. İnanıram ki, Azərbaycan voleybolu, çempionatı əvvəlki nüfuzuna qayıdacaq və yenidən Avropanın ən güclü liqalarından biri olacaq.
Bölmənin digər xəbərləri
