MACARISTANDA HƏLAK OLMUŞ SOVET ƏSGƏRLƏRİNİN XATİRƏSİNİ ƏZİZ TUTURLAR
AZƏRTAC-ın xüsusi müxbiri xəbər verir ki, Azərbaycanın Macarıstandakı səfiri Həsən Həsənov bu günlərdə Yasberen şəhərində olmuş, İkinci Dünya müharibəsində bu ölkənin ərazisində həlak olmuş sovet əsgərlərinin dəfn olunduğu məzarlığın yenidənqurma işlərindən sonra açılışında iştirak etmişdir.
Məzarlıq Yasberen şəhəri meriyasının təşəbbüsü və Hərbi Tarix Muzeyi, Macarıstan Müdafiə Nazirliyi İnstitutunun və Rusiyanın bu ölkədəki səfirliyinin maliyyə dəstəyi ilə yenidən qurulmuşdur. Sovet əsgərlərinin qəbirləri bərpa edilmiş, başdaşlarının üzərində qəhrəmanların adları və sovet ordusunun rəmzi olan qızıl ulduz həkk olunmuşdur.
Tədbirdə Ukrayna və Belarusun səfirləri, Rusiya səfirliyinin müşaviri iştirak etmişlər.
Açılış mərasimində çıxış edən Yasberen şəhərinin meri Zoltan Kiş məzarlığın yenidən qurulmasına göstərilən maliyyə dəstəyinə görə təşəkkürünü bildirmişdir. Hərbi Tarix Muzeyinin və Müdafiə Nazirliyi İnstitutunun direktoru Jojef Holl çıxış edərək bildirmişdir ki, onun ölkəsi Macarıstan ərazisində həlak olan sovet əsgərlərinin xatirəsinə ehtiramla yanaşır.
Sonra obeliskin önünə əklillər qoyulmuşdur.
Bölmənin digər xəbərləri
