Budapeşt, 13 avqust (AZƏRTAC). “XXX Olimpiya oyunlarının sonuna yaxın sərbəst üsulla güləşçilərimiz Toğrul Əsgərov və Şərif Şərifovun Azərbaycan yığmasına qazandırdığı iki qızıl medal Macarıstanın Azərbaycan icmasında böyük ruh yüksəkliyi doğurmuşdur. Bu iki medal bizim üçün səhradakı çiçəyə su qədər lazım idi !”.

Macarıstanda yaşayan həmvətənimiz, hüquqşünas Orxan Bəylərov bu sözləri AZƏRTAC-ın müxbiri ilə müsahibədə demişdir. O, sözünə belə davam etmişdir: “Əslində bizim icmada hamı inanırdı ki, Azərbaycan yığması qızıl medalsız qalmayacaq, dövlət himnimiz səslənəcəkdir. Hamımız əmin idik ki, atletlərimiz heç olmasa bir dəfə fəxri kürsünün ən yüksək pilləsində dayanacaq, himnimizin sədaları altında qaldırılan dövlət bayrağını göstərən videokadrları görəndə gözlərimiz qürur, sevinc yaşı ilə dolacaqdır. Biz Azərbaycan icması adından bu iki eloğluna təşəkkür edirik ki, bizə bu cür xoşbəxt dəqiqələr bəxş etdilər. Bu, bütün xalqımızın, bütün dövlətimizin qələbəsidir. Afərin, uşaqlar!”.

Digər həmvətənimiz, Semmelveys Universitetində təcrübə keçən Kamran Fərəcov AZƏRTAC-ın müxbiri ilə söhbətində demişdir ki, qazanılmış medallar Azərbaycan dövləti tərəfindən ölkədə idmanın inkişafına ayrılan böyük diqqətin qanunauyğun nəticəsidir. K.Fərəcov demişdir: “Hər növbəti olimpiadada idmançılarımızın qazandığı medalların sayı artır. Bu tendensiya davam edəcəkdir. İnanıram ki, növbəti dəfə bizim yığmamız ümumi hesabda daha bir neçə pillə irəliləyəcəkdir. Olimpiadanın sonuna yaxın bizi sevindirmiş iki gənc idmançıya isə arzum budur ki, onlar arxayınlaşmasın, yorulmadan məşqlərini davam etdirsinlər. Axı, dörd ildən sonra biz onlardan yenə medallar gözləyəcəyik. Sükanı belə saxlayın!”.

Macarıstandakı azərbaycanlıların sevincinə macarların da çoxu şərik olmuşdu. AZƏRTAC-ın Budapeştdəki müxbir məntəqəsinə çoxlu telefon zəngləri çalınır, SMS və elektron məktublar göndərilir. Onların müəllifləri bizim güləşçilərin uğuruna görə azərbaycanlılarla bərabər sevinən macarlardır. Məsələn, dəfələrlə Azərbaycanda olmuş macar iqtisadçı Peter Sabo demişdir ki, Azərbaycan idmançılarına heç də macar olimpiyaçılarından az azarkeşlik etmir. O demişdir: “Azərbaycanlılar mənim üçün qardaş xalqdır. Hesab edirəm ki, macarlara azərbaycanlılardan daha yaxın olan xalq yoxdur! Bizim ortaq soykökümüz vardır”.

Pərvanə Qarayeva

AZƏRTAC-ın xüsusi müxbiri

Budapeşt