Maya Sandu: Moldovanın Aİ-yə üzvlüyü ilə bağlı danışıqlar 2027-ci ilədək başa çata bilər
Kişineu, 14 may, AZƏRTAC
Moldova Prezidenti Maya Sandu bildirib ki, ölkənin Avropa İttifaqına daxil olması ilə bağlı danışıqlar 2027-ci ilin sonuna qədər yekunlaşa bilər.
AZƏRTAC bu barədə TV8 telekanalına istinadla xəbər verir.
Dövlət başçısı vurğulayıb ki, 2028-ci ildə danışıqlar başa çatdıqdan sonra sazişin Aİ-yə üzv olan bütün dövlətlər tərəfindən ratifikasiyası mərhələsi başlayacaq. Moldovanın nə vaxt Avropa İttifaqının tamhüquqlu üzvü olacağına məhz o zaman tam qərar veriləcək.
“Mən hesab edirəm ki, danışıqları başa çatdırmaq üçün son real tarix 2027-ci ilin sonuna qədərki dövrdür. Bundan sonra, 2028-ci ildə bütün ölkələrin bizim sazişi dəstəklədiyi və ratifikasiya etməli olduqları dövr başlayacaq”, - deyə Sandu qeyd edib.
Moldova Prezidentinin sözlərinə görə, Avropa rəsmiləri Kişineudakı islahatların sürətini yüksək qiymətləndirirlər. Genişlənmə məsələləri üzrə Avropa komissarı Marta Kos Moldovaya son səfəri zamanı bildirib ki, ölkə Avropaya inteqrasiyanın bütün istiqamətləri üzrə digər namizəd dövlətlərdən daha sürətlə irəliləyir.
Sandu hesab edir ki, ölkənin gələcəyi birbaşa olaraq növbəti parlament seçkilərinin nəticələrindən asılıdır.
“Məsələ bizim parlament seçkilərində hansı seçimi edəcəyimizdədir, çünki hər şey parlamentin və parlament çoxluğunun dəstəyindən asılıdır”, - deyə Moldova lideri əlavə edib.
Emil Hüseynli
AZƏRTAC-ın xüsusi müxbiri
Kişineu
Bölmənin digər xəbərləri
