Mayın 26-da Bakı şəhərinin rayonlarında əvvəlcədən müəyyən edilmiş ərazilərdə kənd təsərrüfatı məhsullarının növbəti satış yarmarkaları keçirilmişdir. Bu dəfə də qiymətlər bazarlardakından xeyli ucuz olmuşdur.

AZƏRTAC-ın müxbirləri satış yarmarkalarında olmuş, reportajlar hazırlamışlar.

NƏSİMİ RAYONU

“Təzə bazar” MMC-nin (S.Vurğun küçəsi, 73) həyətindəki yarmarkada sakinlərə Sabirabad, Salyan, Tovuz, Gədəbəy, Hacıqabul və digər rayonlardan gətirilmiş geniş çeşiddə kənd təsərrüfatı məhsulları satılırdı.

Səhər tezdən şəhər sakinləri təzə məhsulları həvəslə alırdılar. Sabirabad rayonu Suqovuşan kəndindən Nazim Rəhimov sahibkarlığın inkişafına göstərilən qayğıya görə respublikamızın Prezidentinə minnətdarlığını bildirdi. O, şəxsi təsərrüfatında yetişdirdiyi göyərtilərin 5 dəstəsini 20 qəpiyə, xiyarın kiloqramını 50 qəpiyə, çiyələyi 1 manata, kələmi 30 qəpiyə satırdı.

Kənd Təsərrüfatı Nazirliyinin şöbə müdiri İslam İbrahimov qeyd etdi ki, bu gün satışa 19,4 ton məhsul, o cümlədən 6,8 ton ət, 4,5 ton kartof, 6,1 ton tərəvəz, 1,8 ton meyvə, 0,2 ton süd və süd məhsulları, 20 min ədəd yumurta, 50 kiloqram bal və s. çıxarılmışdır. Mal, qoyun, quş ətlərinin qiymətlərində artım müşahidə edilməmişdir. Çiyələk, təzə kartof və kələmin qiymətləri 15-20 faiz aşağı olmuşdur.

NƏRİMANOV RAYONU

Ə. Əliyev küçəsi, 36 A ünvanında yerləşən Keşlə ticarət mərkəzindəki yarmarkaya Xaçmaz, Tovuz, Astara, Salyan və Qobustan rayonlarından 29,7 ton meyvə-tərəvəz, mal, qoyun, toyuq əti, balıq, konserv, bal, 24 min ədəd yumurta gətirilmişdi.

Ticarət mərkəzində xarici ölkələrdən gətirilmiş və çox baha qiymətə satılan alma, armud, gavalı, üzüm və s. meyvələri almaqdan ehtiyat edən alıcılar, yarmarkada Salyan və Xaçmaz rayonlarında yetişdirilmiş qiyməti xeyli ucuz və keyfiyyətli çiyələk, gilas və alça üçün növbəyə dayanmışdılar.

Alıcılara 4,1 ton mal və qoyun əti, 5 ton toyuq əti, 3,2 ton balıq, 1,4 ton ağartı məhsulları, 4,2 ton konserv, 7,3 ton tərəvəz, 3 ton kartof, 1,5 ton meyvə və s. təklif olunurdu.

Nərimanov Rayon İcra Hakimiyyətinin və Kənd Təsərrüfatı Nazirliyinin nümayəndələri yarmarkanın birbaşa bazara köçürülməsinin məhsulların qiymətinin aşağı düşəcəyinə səbəb olacağını bildirmişlər.

XƏTAİ RAYONU

Metronun “Əhmədli” stansiyasının yaxınlığında, “Bakı” kinoteatrının yanında “Bülbülə” kiçik müəssisəsinin “Azər” ticarət mərkəzindəki yarmarkada geniş çeşiddə kənd təsərrüfatı məhsulları satılırdı. Burada kartof, alma, alça, göyərti, pomidor, xiyar çoxluq təşkil edirdi.

Şənbə günü rayon ərazisində fəaliyyət göstərən iki yarmarkaya Quba, Salyan, Kürdəmir, Ağcəbədi, Şəmkir, Qəbələ, Qazax, Gədəbəy, Hacıqabul və Sabirabad rayonlarından 8, 2 ton ət, 3 ton ağartı məhsulları, 20 ton kartof, 7, 6 ton meyvə və digər məhsullar gətirilmişdi. Şəhər sakinləri yarmarkalarda həvəslə bazarlıq edirdilər.

Alıcılar məhsulların qiymətindən və keyfiyyətindən razı qaldıqlarını bildirirdilər.

General Şıxlinski küçəsi, 37 ünvanında, metronun “Həzi Aslanov” stansiyasının yaxınlığındakı “Ordubad” kiçik müəssisəsinin ticarət mərkəzindəki yarmarkada da bolluq idi.

Yarmarkada mal ətinin kiloqramı 3 manat 60 qəpiyə, qoyun əti 4 manata, toyuq əti 2 manat 20 qəpiyə, kartofun kiloqramı 40 qəpiyə, kələmin kilomqramı 30 qəpiyə, göyərtinin dəstəsi 10 qəpiyə, pomidorun kiloqramı 1 manata təklif olunurdu.

SURAXANI RAYONU

Qaraçuxur qəsəbəsi, Yeni Günəşli yaşayış massivi “Günəş” ticarət mərkəzindəki yarmarkaya qobustanlı fermerlər daha çox mal və qoyun əti çıxarmışdılar. Şəhər sakinləri qiymətləri bazarlarla müqayisədə 20-30 faiz ucuz olan məhsulları həvəslə alırdılar.

İşçi qrupunun qərargahından verilən məlumatda bildirilirdi ki, bu gün yarmarkaya Samux, Balakən və digər rayonlardan 8 ton meyvə-tərəvəz və ət məhsulları gətirilmişdir.

Burada əhaliyə təklif edilən geniş çeşiddə kənd təsərrüfatı məhsullarının keyfiyyəti də yüksək idi.

Əmircan qəsəbəsinin S.Bəhlulzadə küçəsində, “Suraxanı Maşınqayırma Zavodu” Açıq Törəmə Səhmdar Cəmiyyətinin ərazisində təşkil olunmuş yarmarkaya çıxarılan kartof, soğan, kələm, buğda, ət və digər məhsulların ümumi miqdarı isə 6 ton idi. Cəlilabaddan gətirilmiş həmin məhsulların da xeyli hissəsi bir neçə saat ərzində satılmışdı.

YASAMAL RAYONU

A.Şərifzadə küçəsi, 194, metronun “İnşaatçılar” stansiyasının yaxınlığındakı yarmarkada bir çox məhsulların qiymətlərində ucuzlaşma olmuşdur ki, bu da alıcılar tərəfindən müsbət qarşılanmışdır. Xüsusilə kələm, xiyar, çiyələk və digər malların qiyməti ötən həftələrlə müqayisədə 50 faiz aşağı düşmüşdü. Bu yarmarkada yaradılan məhsul bolluğu ilə əlaqədardır.

Yarmarkada satışa Salyan, Dəvəçi, Qusar, Sabirabad və digər rayonlardan 6 ton kartof, 7 ton tərəvəz, 3 ton meyvə, 1,5 ton ət, 10 min ədəd yumurta çıxarılmışdı.

Yerli fermerlər və fiziki şəxslər tərəfindən indiyədək yarmarkaya 120 tondan çox geniş çeşidli kənd təsərrüfatı məhsulları gətirildiyini bildirən Qusar Rayon İcra Hakimiyyəti başçısının aqrar məsələlər üzrə müavini Şair Paşayev, bu işin hazırda uğurla davam etdirildiyini söylədi. O bildirdi ki, hazırda rayon ərazisində yetişməkdə olan məhsullar da yaxın vaxtlarda paytaxt sakinlərinə təklif ediləcəkdir.

Qeyd edilmişdir ki, qusarlılar yarmarkaya daha çox kartof, kələm, alma və qablaşdırılmış turşular çıxarmışlar.

Salyandan gətirilmiş mal və qoyun əti satılan ərazidə alıcıların növbə yaratması bu məhsula tələbatın daha çox olduğunu göstərirdi. Elə bu məqsədlə də hər dəfə yarmarkaya adı çəkilən rayondan 1 tondan çox ət gətirilir.

SƏBAİL RAYONU

Badamdar qəsəbəsinin mərkəzində 9, 7 və 5 mərtəbəli binaların həyətində, 239 nömrəli məktəbin yaxınlığındakı yarmarkada əsl canlanma hiss olunurdu. Bunun səbəbi gətirilən malların bolluğu və yeni məhsulların üstünlük təşkil etməsidir.

Yarmarkaya Salyan, Ağdaş və digər rayonlardan 1 ton soğan, kartof, 400 kiloqram pomidor, xiyar, 1,5 ton kələm, 500 kiloqram mal əti və digər məhsullar çıxarılmışdı.

Alıcı Babək Ağayev bildirdi ki, qəsəbədə yaradılan bu yarmarka aztəminatlı ailələr üçün əlverişli imkanlar yaratmış və hər bir sakin buradan müvafiq qiymətə istənilən məhsulu əldə edə bilir.

Salyanlı fermer Zahid Qəmbərov söylədi ki, artıq 20-ci dəfədir ki, yarmarkaya məhsul gətirir və alıcılara ağartı məhsulları təklif edir. Bu vaxt ərzində 1 tona yaxın ağartı məhsulları satdığını bildirən Z.Qəmbərov sakinlərin bu məhsulu həvəslə aldıqlarını vurğuladı. Onun dediyinə görə, satdığı ağartı öz şəxsi fermasında saxlanılan heyvanlardan alınmış süd məhsullarından hazırlanaraq qablaşdırılmışdır.