“Mədəni və yaradıcı sənayelər üzrə xüsusi Təqaüd Proqramı”nın bu il üzrə seçim mərhələsi yekunlaşıb
Bakı, 12 avqust, AZƏRTAC
Mədəniyyət Nazirliyinin “Mədəni və yaradıcı sənayelər üzrə xüsusi Təqaüd Proqramı” çərçivəsində 2026-cı il üzrə keçirdiyi müsabiqənin seçim mərhələsi başa çatıb.
Nazirlikdən AZƏRTAC-a bildirilib ki, proqram üzrə cari il iyunun 2-dən 16-dək audiovizual sənətlər, dizayn, memarlıq, mədəni və yaradıcı sahələr üzrə menecment və digər ixtisas istiqamətlərində bakalavriat və magistratura səviyyələrində xaricdə təhsilin maliyyələşdirilməsi üçün sənəd qəbulu həyata keçirilib.
Sənəd qəbulu müddətində https://my.culture.az portalında şəxsi kabinet vasitəsilə ümumilikdə 51 nəfər qeydiyyatdan keçib. Onlardan 18-i bakalavriat, 33-ü isə magistratura səviyyəsi üzrə müraciət edib.
Təqaüd Proqramının Qaydalarına uyğun olaraq, namizədlərin seçimi iki mərhələdə aparılıb. Birinci mərhələdə namizədlərin təqdim etdikləri sənədlər qiymətləndirilib, növbəti mərhələdə isə tələblərə uyğun namizədlərlə müsahibələr keçirilib, onların nəzəri bilikləri, praktiki bacarıqları və yaradıcı potensialı dəyərləndirilib. Ümumilikdə 34 namizəd müsahibə mərhələsində iştirak edib.
Mədəniyyət Nazirliyi yanında müvafiq sahələr üzrə mütəxəssislərdən ibarət “Mədəni və yaradıcı sənayelər üzrə xüsusi Təqaüd Proqramının Komissiyası”nın qiymətləndirməsinin nəticələrinə əsasən, 17 namizəd Təqaüd Proqramından yararlanmaq hüququ qazanıb.
Təqaüd Proqramı çərçivəsində təhsil xərcləri namizədlərin yekun qiymətləndirmə nəticələri nəzərə alınmaqla tam və ya qismən maliyyələşdiriləcək.
Təqaüdçülərdən 7-si bakalavriat, 10-u isə magistratura səviyyəsi üzrə Amerika Birləşmiş Ştatları, Birləşmiş Krallıq, İtaliya, Kanada, Çin, Türkiyə və digər ölkələrin ali təhsil müəssisələrində təhsilini davam etdirəcək.
Qeyd edək ki, Təqaüd Proqramı “Azərbaycan Respublikasının 2022–2026-cı illərdə sosial-iqtisadi inkişaf Strategiyası”nın Tədbirlər Planında nəzərdə tutulan “Mədəni və yaradıcı sənayelərin dinamik inkişafının təmin edilməsi və bu sahədə ixrac potensialının gücləndirilməsi” fəaliyyət istiqaməti üzrə həyata keçirilir.
Eyni zamanda, “Azərbaycan Mədəniyyəti-2040” Azərbaycan Respublikasının Mədəniyyət Konsepsiyasının 2026–2030-cu illər üzrə Tədbirlər Planında xaricdə təhsil proqramları vasitəsilə mədəniyyət sahələri üzrə peşəkar kadrların hazırlanması, əmək bazarının tələblərinə cavab verən, yaradıcı və innovativ düşüncəyə malik kadr ehtiyatının formalaşdırılması nəzərdə tutulur.
Xatırladaq ki, Təqaüd Proqramı 15 yaşdan yuxarı, yaradıcı potensialını inkişaf etdirmək və mədəniyyətin müxtəlif sahələrində peşəkar fəaliyyət göstərmək niyyətində olan Azərbaycan vətəndaşları üçün nəzərdə tutulub. Proqram xarici ali təhsil müəssisələrinə qəbul olunmuş və ya həmin müəssisələrdə öz vəsaiti hesabına təhsil alan şəxslərin təhsil xərclərinin tam və ya qismən maliyyələşdirilməsini əhatə edir.
Bölmənin digər xəbərləri
