Bakı, 19 yanvar (AZƏRTAC). Meksika arxeoloqları yaşı iki min ilə yaxın olan 3 minədək qayaüstü rəsm aşkar etmişlər.

Qədim tayfaların rəsmləri qazıntıların aparıldığı 40 arxeoloji zonada aşkar edilmişdir. Qayalarda əbədiləşdirilmiş rəsmlərin böyük hissəsi qədim ayinlərdən söz açan səhnəciklər, quş və heyvan təsvirləridir. Qədim rəssamlar, əsasən, qırmızı, qara və sarı boyalardan istifadə etmişlər.

Arxeoloqlar təxmin etmişlər ki, qayaüstü təsvirlər müasir Quanaxuato ştatının ərazisində məskunlaşan ovçu tayfalarından qalmışdır. Qeyd edək ki, tədqiqatçılar bəzi rəsmlərdə təyinatı indiyədək alimlərə aydın olmayan əşyalar aşkar etmişlər.