AZƏRTAC xəbər verir ki, bu barədə Milli Məclis sədrinin müavini Bahar Muradova yanvarın 30-da keçirdiyi mətbuat konfransında məlumat vermişdir.

Tədbirdə Milli Məclis Aparatının rəhbəri Səfa Mirzəyev, aparatın şöbə müdirləri, parlamentin daimi komissiyalarının sədrləri iştirak etmişlər.

Parlamentin ötənilki fəaliyyətini yüksək qiymətləndirən B.Muradova demişdir ki, Milli Məclisin 2007-ci il yaz və payız sessiyalarında ümumilikdə 33 iclas keçirilmiş, 298 qanun və qərar qəbul edilmişdir. Hesabat dövründə Milli Məclis Konstitusiya ilə nəzərdə tutulan qanunvericilik səlahiyyətlərini tam həcmdə yerinə yetirmişdir. Azərbaycan Prezidenti İlham Əliyevin rəhbərliyi ilə ölkədə həyata keçirilən islahatlar parlament tərəfindən dəstəklənmiş və bu islahatların hüquqi bazasının möhkəmləndirilməsi istiqamətində əməli addımlar atılmışdır.

2007-ci ildə Milli Məclisə vətəndaşlardan 5501 təklif, ərizə və şikayət daxil olmuş, parlamentdə 5089 vətəndaş qəbul edilmişdir. Bu göstərici əvvəlki ilin müvafiq dövrü ilə müqayisədə (2006-cı ildə - 6205 nəfər) 1116 nəfər və ya 18 faiz azalmışdır. Milli Məclisə müraciət edən vətəndaşların sayının azalmasının başlıca səbəbi ölkə iqtisadiyyatının, xüsusilə də bölgələrin inkişafı, deputatlarla seçicilərin görüşlərinin və onların qəbulunun yaxşılaşdırılması olmuşdur. Hesabat ilində fəaliyyət göstərən deputat köməkçilərinin gördükləri tədbirlər sayəsində yerlərdən öz deputatları ilə görüşmək üşün Milli Məclisə üz tutan vətəndaşların sayı müəyyən qədər azalmışdır. Bununla yanaşı, Milli Məclisin yeni internet saytı istifadəyə verilmiş, vətəndaşlar elektron poçt vasitəsilə də parlamentə müraciət etmək imkanı qazanmışlar.

Ötən sessiyada Milli Məclis Aparatında akkreditə olunmaq üçün 85 kütləvi informasiya vasitəsindən müraciət daxil olmuşdur. Onlardan 63-ü akkreditasiyadan keçmişdir. Ötən dövrdə Milli Məclisin fəaliyyətini 8 televiziya kanalı, 5 radio, 13 informasiya agentliyi, 36 qəzet işıqlandırmışdır.

Ötən il parlamentin beynəlxalq əlaqələrinin inkişafı sahəsində də mühüm işlər görülmüş, həyata keçirilmiş qarşılıqlı səfərlər nəticəsində Milli Məclisin əməkdaşlıq imkanları xeyli genişlənmişdir.

Milli Məclisdə deputatların iş şəraitinin yaxşılaşdırılması məqsədi ilə aparılan yenidənqurma tədbirləri davam etdirilmişdir. Noyabrın 3-də Azərbaycan parlamentinin inzibati binasının yeni korpusunun təməlqoyma mərasimi keçirilmişdir.

Ötən dövrdə Milli Məclisdə hüquqi, iqtisadi, aqrar, sosial sahələrə dair mühüm qanunlar qəbul olunmuşdur.

2007-ci ildə Milli Məclisdə baxılmış ən mühüm sənədlərdən biri də geniş ictimaiyyətin çoxdan gözlədiyi “Təhsil haqqında” qanun layihəsinin birinci oxunuşda müzakirədən keçməsidir. Növbəti sessiyada layihənin komissiyalarda müzakirəsindən sonra parlamentdə ikinci və üçüncü oxunuşdan keçməsi də nəzərdə tutulmuşdur.

B.Muradova demişdir ki, Milli Məclisin yaz sessiyası fevralın 1-də öz işinə başlayacaqdır. Sessiyanın qanunvericilik planına 20-dən çox qanun layihəsi daxil edilmişdir. Bununla yanaşı, sessiyada qanunvericilik təşəbbüsü qaydasında parlamentə təqdim olunmuş sənədlərə də baxılacaqdır. Yaz sessiyasında İnzibati-Prosessual və Rəqabət məcəllələrinin, “Məişət zorakılığının qarşısının alınması haqqında”, “Hərbi qulluqçuların intizam həbsi haqqında”, “Qeyri-qanuni yolla əldə edilmiş pul vəsaitlərinin və digər əmlakın leqallaşdırılması və terrorçuluğun maliyyələşdirilməsinə qarşı mübarizə haqqında”, “İnvestisiyalar haqqında”, “Hesablama Palatası haqqında”, “Ekoloji kənd təsərrüfatı haqqında”, “Bələdiyyələrə əlavə səlahiyyətlərin verilməsi haqqında”, “İnternet təchizi (provayder) fəaliyyəti haqqında”, “Uşaq və gənclər idmanı haqqında”, “Yaradıcı işçilər və yaradıcılıq birlikləri haqqında” və digər qanun layihələrinə baxılması nəzərdə tutulmuşdur.

Sonda Bahar Muradova, Milli Məclis Aparatının rəhbəri Səfa Mirzəyev, daimi komissiyaların sədrləri, aparatın şöbə müdirləri jurnalistləri maraqlandıran sualları cavablandırmışlar.