MİLLİ MƏCLİSİN SƏDRİ OQTAY ƏSƏDOV AQO QRUPUNUN RƏHBƏRİ İLƏ GÖRÜŞMÜŞDÜR
AZƏRTAC-ın xüsusi müxbiri xəbər verir ki, Avropa Şurası ölkələrinin parlament sədrlərinin Avropa konfransı çərçivəsində Milli Məclisin sədri Oqtay Əsədov mayın 23-də Nazirlər Komitəsi AQO qrupunun hazırkı sədri, Rumıniyanın qurum yanındakı daimi nümayəndəsi Steyan Stoyanla görüşmüşdür.
Azərbaycanın Avropa Şurası yanındakı daimi nümayəndəsi səfir Arif Məmmədov AZƏRTAC-ın müxbirinə bildirmişdir ki, söhbət zamanı ölkəmizdə qarşıdakı prezident seçkiləri barədə fikir mübadiləsi aparılmış, bu mühüm hadisə ilə əlaqədar qrupla Azərbaycan arasında əməkdaşlıq müzakirə edilmişdir.
Oqtay Əsədov seçki ilə bağlı Azərbaycanda həyata keçirilən islahatlar və mövcud qanunvericilik aktları barədə geniş məlumat vermiş, seçkilərin Avropa Şurasının standartlarına tam cavab verəcəyini, Azərbaycanın ən demokratik, ən şəffaf seçkilər keçirilməsində israrlı olduğunu bildirmişdir.
Görüşdə Nazirlər Komitəsi sədrinin Azərbaycana səfərinin nəticələri yüksək qiymətləndirilmiş, AQO qrupunun səfərinin komitədə geniş müzakirə edildiyi bildirilmiş, ölkəmizdə seçkiqabağı vəziyyət müsbət dəyərləndirilmişdir. Etnik qruplar, alternativ xidmətlə bağlı müəyyən qanunların qəbul edilməsi məsələsinə toxunulmuşdur. Milli Məclisin sədri bu halların təkcə Azərbaycanda deyil, Avropa Şurasının üzvü olan digər ölkələrdə də mövcud olduğunu vurğulamışdır.
Bölmənin digər xəbərləri
