MİLLİ TARİXİMİZİN ŞANLI SƏHİFƏSİ
AZƏRTAC xəbər verir ki, mayın 23-də Səbail Rayon Gənclər və İdman İdarəsinin təşkilatçılığı ilə müsəlman Şərqində ilk demokratik respublikanın yaradılmasının 90-cı ildönümünə həsr olunmuş “Tarixin şanlı səhifəsi” mövzusunda elmi-praktik konfrans keçirilmişdir.
Konfrans iştirakçıları əvvəlcə İstiqlaliyyət küçəsində Azərbaycan Xalq Cümhuriyyətinin şərəfinə ucaldılmış abidəni ziyarət edərək, önünə gül dəstələri qoymuşlar.
Azərbaycanda Atatürk Mərkəzində keçirilən konfransda Səbail Rayon İcra Hakimiyyəti başçısının birinci müavini Xalidə Bayramova, rayon gənclər və idman idarəsinin rəisi Vüqar Mürsəlov, Milli Məclisin deputatları Aydın Mirzəzadə, Cəmil Həsənli, habelə tarix elmləri doktoru, professor Musa Qasımlı və başqaları Xalq Cümhuriyyətinin yaranma tarixindən, onun süquta uğramasının səbəblərindən danışmışlar.
Bildirilmişdir ki, müasir Azərbaycan Respublikası 1991-ci ildə öz müstəqilliyini bərpa edərək, Xalq Cümhuriyyətinin siyasi varisi kimi onun bayrağını, gerbini, himnini qəbul etmişdir. İstiqlal Bəyannaməsinin elan edildiyi 1918-ci ilin 28 may günü hazırda Respublika günü kimi qeyd olunur. Müsəlman Şərqində ilk parlament respublikası - Azərbaycan Xalq Cümhuriyyəti xalqımızın qədim dövlətçilik ənənələrinə sadiq qalaraq müasir dövrə xas dövlət təsisatlarının yaradılmasına nail olmuşdu. Milli parlamentarizmin təşəkkül tarixi isə Azərbaycan parlamentinin 1918-ci il dekabr ayının 7-də keçirilmiş ilk iclasından başlayır.
Vurğulanmışdır ki, Azərbaycan Xalq Cümhuriyyətinin yaranması mürəkkəb siyasi dövrdə cərəyan edən hadisələrin və Azərbaycan xalqının milli oyanışının məntiqi yekunu idi. Görkəmli şəxsiyyətlər tərəfindən təməli qoyulmuş proseslər Azərbaycanda yeni tipli teatrın, məktəbin və mətbuatın yaranması ilə nəticələnmiş, milli özünüdərkin gerçəkləşməsinə böyük təsir göstərmişdir. Bakının neft paytaxtına çevrilməsi milli sahibkarlar təbəqəsinin formalaşması ilə yanaşı, dünyanın aparıcı universitetlərində təhsil almış ziyalılar nəslinin yetişməsinə şərait yaratmışdır. Əlimərdan bəy Topçubaşov və başqa ziyalıların siyasi proseslərə qatılması, Dumaya seçilməsi və Rusiya müsəlmanlarının təşkilatlanmasında oynadıqları rol tariximizin unudulmaz səhifələrindəndir. Azərbaycan Xalq Cümhuriyyətinin öz dövlətçilik atributlarını qəbul etməsi, dövlət, hərbi quruculuq, iqtisadiyyat, mədəniyyət, təhsil və səhiyyə sahələrində atdığı addımlar xalqımız üçün taleyüklü əhəmiyyət kəsb etmişdir.
Konfransda “Azərbaycan Xalq Cümhuriyyəti milli oyanışın məntiqi yekunu kimi”, “Azərbaycan Xalq Cümhuriyyəti və ərazi bütövlüyü problemi”, “Milli dövlətçiliyin formalaşmasında Azərbaycan Xalq Cümhuriyyəti parlamentinin rolu” mövzularında məruzələr dinlənilmişdir.
Məruzələr ətrafında çıxışlarda qeyd olunmuşdur ki, müstəqilliyi qazanmaq nə qədər ağırdırsa, onu qoruyub saxlamaq, gələcək nəsillərə ötürmək ondan da çətin prosesdir. Bunu çox yaxşı anlayan xalqımız ulu öndər Heydər Əliyevin müstəqil dövlətimizin möhkəmlənməsinə və qüdrətlənməsinə hesablanmış strateji xəttini daim dəstəkləyir və bu strategiyanı uğurla davam etdirən Prezident İlham Əliyevin ətrafında sıx birləşir.
Bölmənin digər xəbərləri
