Millinin baş məşqçisi: Hidayətin qazandığı qızıl medal basketbol yığmamıza bugünkü oyunda yüksək motivasiya verəcək
Bakı, 30 iyul, AZƏRTAC
“Olimpiadaya vəsiqə qazanmaq özü böyük qürurdur. Bizim qızlardan ibarət millimiz də bunu bacardı. Bugünkü qarşılaşmada yaxşı nəticə üçün sonadək döyüşəcəklərinə inanıram”.
Bu sözləri AZƏRTAC-a açıqlamasında kişi basketbolçulardan ibarət Azərbaycan millisinin baş məşqçisi Tahir Baxşıyev 3x3 qadın yığmamızın “Paris-2024” Yay Olimpiya Oyunlarında İspaniya ilə keçirəcəyi oyun barədə danışarkən deyib.
Təcrübəli mütəxəssis ilk oyunların hər zaman həyəcanlı keçdiyini bildirib: “İlk dəfə basketbol idman növündə Olimpiya Oyunlarında təmsil olunacağıq. Xalqımız üçün böyük gündür. Komandamızı ağır sınaq gözləyir. İspaniya basketbolu sürətli oyun və dəqiq “üçlük” atışlarını bacaran komandadır. Bu, onların bir növ taktikasıdır. Yığmanın baş məşqçi Raşa Deliç və qızlar bunu yaxşı analiz ediblər. Onlarla danışmışam. Çox ağır məşq prosesi keçirdilər. Ümid edirəm ki, əziyyətlərinin bəhrəsini görəcəklər”.
T.Baxşıyev Azərbaycan cüdoçusu Hidayət Heydərovun ötən gün Olimpiya çempionu olmasının yığmaya böyük motivasiya verəcəyini söyləyib: “Yüksək əhvali-ruhiyyə üçün “Paris-2024”dən qızıl gözləyirdik. Hər kəs çox həyəcanlı idi. Şükür ki, Hidayət bunu bacardı. Onun nəticəsi bugünkü İspaniya ilə matçda qızlara kömək olacaq. İdmanda mümkünsüz heç nə yoxdur”.
Qeyd edək ki, Azərbaycan millisinin İspaniya yığması ilə görüşü bu gün Bakı vaxtı ilə saat 23:00-da başlayacaq.
Bölmənin digər xəbərləri
