Bakı, 21 sentyabr, AZƏRTAC

Partlayışdan möcüzə nəticəsində sağ çıxdıq. Həmin gün yaddaşımızdan heç vaxt silinməyəcək çox ağır hadisənin şahidi olduq.

Bunu AZƏRTAC-a müsahibəsində 2021-ci il iyunun 4-də Kəlbəcərin Susuzluq kəndində baş vermiş mina partlayışından zərər çəkən “Azərbaycan Televiziya və Radio Verilişləri” Qapalı Səhmdar Cəmiyyətinin (AzTV) rejissoru Emin Məmmədov deyib.

O, həmin hadisəni belə xatırlayır: “2021-ci il mayın 31-də Ağdam və digər rayonlarda foto və videoçəkilişlər apardıqdan sonra Kəlbəcər rayonuna ezam olunduq. İyunun 4-nə kimi təxminən 15 kənddə foto və video çəkilişlər həyata keçirdik. İyunun 3-ü axşam bizə məlumat gəldi ki, ayın 4-də rayonun dörd kəndində çəkilişlər olmalıdır. O kəndlərdən biri də Susuzluq kəndi idi. İyunun 4-də saat 11 radələrində Susuzluq istiqamətinə gedərkən tank əleyhinə minaya düşdük. Böyük bir partlayış baş verdi. KAMAZ markalı avtomobildə 7 nəfər idik. Qabaqda üç nəfər oturmuşduq. Partlayışdan sonra sürücünün kreslosu alovlanmağa başladı. Qışqırdım ki, dərhal maşından düşmək lazımdır. Maşından düşüb bir az irəliyə qaçdıq. Bu zaman Kəlbəcər Rayon İcra Hakimiyyətinin nümayəndəsinin yardıma çağıran səsini eşitdik. Dərhal ona tərəf gedib sürücü ilə birlikdə onu alışan maşından çıxardıq. İkinci dəfə maşına tərəf qaçaraq jurnalistlər – AzTV-nin operatoru Sirac Abışovla AZƏRTAC-ın müxbiri Məhərrəm İbrahimova səsləndim. Fikirləşirdim ki, yəqin onlar da sağdırlar. Lakin hadisə yerində Siracın jileti və kamerası qalmışdı. Maşının qabaq hissəsinə yaxınlaşanda Susuzluq kəndinin nümayəndəsinin, ondan bir az irəlidə isə Məhərrəmin cansız bədənlərini gördüm. Siracı isə tapmadıq. Vəziyyətimiz yaxşı deyildi, hadisə yerinə təcili və təxirəsalınmaz tibbi yardım maşını, ANAMA-nın əməkdaşları, mühəndislər gəldilər. Bizi ərazidən təxliyə edərək Kəlbəcərdəki “N” saylı hərbi hissənin hospitalına yerləşdirdilər. Hospitala gedərkən yolda fikirləşirdim ki, bəlkə Sirac sağdır. Təəssüflər olsun ki, heç 10 dəqiqə keçmədi onun da şəhid olması xəbəri gəldi”.

Mina partlayışından zərər çəkən bildirib ki, beynəlxalq təşkilatlar erməni vandalizmini pisləsələr də, Ermənistana ölkəmizə qarşı apardığı mina terroruna görə təzyiq göstərmirlər: “Bunun nəticəsidir ki, 44 gün Vətən müharibəsində Qələbə əldə edildikdən sonra Üçtərəfli Bəyanat imzalansa da onlar doğru-düzgün mina xəritələrini bizə vermirlər. Nəticədə azad edilmiş ərazilərdə mina terroru davam edir. Sentyabrın 19-da erməni kəşfiyyat-diversiya qruplarının Əhmədbəyli-Füzuli-Şuşa avtomobil yolunda terror məqsədilə əvvəlcədən quraşdırdığı minaların partlaması nəticəsində Azərbaycan Avtomobil Yolları Dövlət Agentliyinin əməkdaşları və Daxili İşlər Nazirliyinin Daxili Qoşunlarının hərbi qulluqçuları həlak oldu. Hər dəfə mina partlayışı xəbərini eşidəndə yaşadığım acı hadisəni xatırlayıram. Doğrudur, Ordumuzun bölmələri lokal antiterror tədbiri keçirərək baş verənlərin qisasını aldı, lakin beynəlxalq ictimaiyyət də Ermənistana təzyiq göstərməlidir ki, mina xəritələrini versinlər, bizə növbəti belə hadisələr yaşatmasınlar”.