Misir ildə 2 milyard kilovat-saat enerji istehsal edəcək külək elektrik stansiyasını işə salır
Qahirə, 21 mart, AZƏRTAC
Misirin əl-Bəhr əl-Əhmər vilayətinin Ras Qarib regionunda tikilmiş Amont Külək Elektrik Stansiyasının may ayında ölkənin ümumi elektrik şəbəkəsinə qoşulması məqsədilə sınaq işlərinə başlanıb.
AZƏRTAC yerli mediaya istinadla xəbər verir ki, bu məqsədlə stansiyanın generatorlarına 500 meqavat gücündə gərginlik verilib.
Birləşmiş Ərəb Əmirliklərinin AMEA şirkəti tərəfindən həyata keçirilən layihənin dəyəri 700 milyon dollardır və ildə təqribən 2 milyard kilovat-saat enerji istehsal edəcək. Bu da öz növbəsində karbon tullantılarının ildə təxminən 1,3 milyon ton azaldılmasına töhfə verəcək, 200 mindən çox mənzili enerji ilə təmin edəcək.
Layihə Misirdə bərpaolunan enerji sahəsində həyata keçirilən və ümumi investisiya dəyəri 2 milyard dollardan çox olan mühüm layihələrdən biridir. Bu çərçivədə Asuanda “Abidos 1” Günəş Elektrik Stansiyası işə salınıb. Bundan başqa, enerjinin saxlanması yerlərinin və digər külək enerjisi stansiyalarının inşası layihələri yerinə yetirilir.
Şıxəli Əliyev
AZƏRTAC-ın xüsusi müxbiri
Qahirə
Bölmənin digər xəbərləri
