Mixail Finkel: İsrail Azərbaycana minalanmış ərazilərin xəritəsini ani şəkildə bərpa edən unikal texnologiya verəcək
Bakı, 10 iyun, Nadiyə Qafarova, AZƏRTAC
Ermənilər minalanmış sahələrin xəritəsini verməyiblər və verməyəcəklər, çünki onların məqsədi Azərbaycanın mülki əhalisinin həyatına və sağlamlığına maksimum ziyan vurmaqdır. Bu, əsl terrorizmdir, bütün beynəlxalq konvensiyalara ziddir.
İsrailli məşhur politoloq, beynəlxalq hüquq sahəsində ekspert Mixail Finkel bu fikirləri AZƏRTAC-a müsahibəsində söyləyib.
AZƏRTAC həmin müsahibəni təqdim edir.
X X X
-İlk növbədə, Azərbaycanın işğaldan azad edilmiş Kəlbəcər rayonunun Susuzluq kəndində baş vermiş faciə barədə sizin fikrinizi eşitmək istərdik. Həmin rayonda tank əleyhinə minanın partlaması nəticəsində Azərbaycanın üç dinc sakini - Azərbaycan Dövlət İnformasiya Agentliyinin (AZƏRTAC) müxbiri Məhərrəm İbrahimov, AzTV-nin operatoru Sirac Abışov və Kəlbəcər Rayon İcra Hakimiyyətinin Susuzluq kənd inzibati-ərazi dairəsi üzrə nümayəndəsinin müavini Arif Əliyev həlak olub, dörd nəfər ağır yaralanıb. Görəsən, daha neçə insan həlak olmalıdır ki, dünya birliyi və beynəlxalq təşkilatlar Ermənistanı bu əməllərinə görə cavab verməyə çağırsınlar, ondan minalanmış ərazilərin xəritəsini verməsini tələb etsinlər? Sizin fikrinizcə erməni təxribatları ilə bağlı aşkar faktlar barədə susmağı nə ilə izah etmək olar?
-Bir neçə gün bundan əvvəl iki azərbaycanlı jurnalistin və bir nəfər yerli hakimiyyət nümayəndəsinin həlak olması xəbərini eşidəndə hamımız sarsıldıq. Bu hadisə nəticəsində daha bir neçə nəfər yaralanıb. Bütün bunlar Qarabağın tamamilə minalanmasının nəticəsidir. Təəssüf ki, yollar, qəbiristanlıqlar, mülki obyektlər minalanıb. Deməli, erməni tərəfi döyüş əməliyyatları dayandırılandan sonra faktiki olaraq müharibəni davam etdirir. Minalar partlayır, dinc vətəndaşlar həlak olur. Bunun bir adı var: terror. Ermənilər minalanmış sahələrin xəritəsini verməyiblər və verməyəcəklər, çünki onların məqsədi Azərbaycanın mülki əhalisinin həyatına və sağlamlığına maksimum ziyan vurmaqdır. Bu, əsl terrorizmdir, bütün beynəlxalq konvensiyalara ziddir. Azərbaycan həmin əraziləri müstəqil olaraq minalardan təmizləməlidir, onun başqa yolu yoxdur. Məndə olan məlumata görə, İsrail Azərbaycan tərəfinə Qarabağın minalardan təmizlənməsi üçün ən müasir texnologiyaların verilməsi üzərində işləyir. Bu texnologiyaların mahiyyəti - dronlardan istifadə etməklə torpağı dərindən skanlamaq, minanın olduğu yeri aşkar etmək və müvafiq informasiyanı operatora göndərməkdir. Yəni, minalanmış ərazilərin xəritəsi ani olaraq yaradılacaq. Hazırda son sınaqlar keçirilir və lap yaxın vaxtlarda bu unikal İsrail texnologiyası Azərbaycana təqdim ediləcək.
-Məlum olduğu kimi, erməni kilsəsi tarixən regional münaqişələrin mərkəzində olub, ayrı-seçkilik yaradıb və fitnə-fəsadlar təşkil edib. Bunlar tarixi faktlardır. Ermənilər indi də sosial şəbəkələrdə qürurla bəyan edirlər ki, Azərbaycanın işğaldan azad edilmiş ərazilərində terror aktları törədilməsində erməni keşişlərin əli var. Bu, nə deməkdir - varislik ənənələri? Bu barədə sizin fikrinizi eşitmək istərdik...
-Təəssüf ki, erməni kilsəsi düzgün siyasət yürütmür. İsa Peyğəmbər öyrədirdi ki, insanlar hətta öz əleyhdarlarını və düşmənlərini də sevməlidirlər. Erməni kilsəsinin siyasəti İsa Məsihin siyasəti deyil. Bu siyasət ermənilərin münaqişə vəziyyətində olduğu insanlara qarşı döyüşkənlik və nifrət siyasətidir. Əslində, bütün konfessiyaları təmsil edən din xadimləri insanlara sevgi hissi, sülh təbliğ etməyə, ümumbəşəri dəyərlər aşılamağa borcludurlar. Burada isə, təəssüf ki, tamam başqa vəziyyətdir. Özünün hamıdan üstün olması barədə sayıqlamalar, ifrat millətçilik, özündən başqa hamını alçaltmaq siyasəti yürüdülür. Təəssüf ki, diaqnoz belədir.
-Siz Ermənistanda indiki siyasi vəziyyəti necə qiymətləndirirsiniz? Bu ölkədə, ermənilərin şüurunda və dünya baxışında nələr dəyişməlidir ki, onlar qonşularla sülh şəraitində yaşamağı öyrənsinlər?! Axı, aşkardır ki, bu cür açıq düşmənçilik ovqatında və vəziyyəti daim gərginləşdirməyə cəhd göstəriləndə, hətta bizim tərəfin xoşməramlı və loyal mövqeyini nəzərə alsaq belə, dinc yanaşı yaşamaq mümkün deyil. Daim bizim millətin nümayəndələrini qətlə yetirmək, onları qılıncdan keçirmək arzusu ilə yaşayan və bu manyak arzusunu kütləvi informasiya vasitələrində, mətbuatda və yüksək hakimiyyət eşelonlarında tirajlayan adamlarla sülh şəraitində yaşamaq mümkündürmü?
-Mənim fikrimcə, Ermənistanda siyasi vəziyyət tamamilə ümidsizdir. Mən bu ölkədə hadisələrin inkişafında hər hansı müsbət dinamika görmürəm. Əgər uşaqlara lap körpə yaşından öz millətinin müstəsnalığı və başqa millətlərdən üstünlüyü fikrini aşılayırlarsa, onların beyinlərinə nifrət, təkcə Qarabağı deyil, bütün Azərbaycanı, Türkiyəni işğal etmək fikrini, erməni tanklarının Bakıya daxil olması ideyasını yeridirlərsə, bütün Asiyanın və digər torpaqların əzəli erməni torpağı olduğunu deyirlərsə, burada nə deyəsən? Vaxtilə Üçüncü Reyxdə də belə fikir aşılanırdı. Lakin İkinci Dünya müharibəsindən sonra müttəfiqlər Almaniyada millətçiliyə əks siyasət yürütməyə başladılar. Bu, məcburi proqram öz səmərəsini verdi. Lakin müttəfiqlər bundan ötrü Hitler rejimini tamamilə darmadağın etdilər və almanları zorla öyrətdilər ki, onlar azadlıq, bərabərlik və humanitar hüquq kimi ümumbəşəri dəyərlərə hörmət etsinlər. Ermənistanda bütün bunların olmayacağına şübhə edirəm.
Bölmənin digər xəbərləri
