Moldova Baş nazirinin müavini: Azərbaycanla kənd təsərrüfatının inkişafı və investisiyalar ilə bağlı bir sıra məsələləri həll etdik
Bakı, 11 aprel, AZƏRTAC
Bu gün Azərbaycan Respublikası ilə Moldova Respublikası arasında İqtisadi Əməkdaşlıq üzrə Birgə Hökumətlərarası Komissiyanın 6-cı iclasını keçirdik. Biz 2022-ci ildən bəri yenidən məhsuldar işləməyə başlamışıq. Hesab edirəm ki, bu qəbildən olan iclasların hər il keçirilməsi əsas uğurlardan biridir. Biz Azərbaycan tərəfi ilə birgə kənd təsərrüfatının inkişafı və investisiyalar, həmçinin dövlətlərimiz arasında münasibətlərə dair bir sıra məsələləri həll etdik.
AZƏRTAC xəbər verir ki, bu barədə jurnalistlərə Moldova Baş nazirinin müavini, infrastruktur və regional inkişaf naziri Vladimir Bolea Birgə Hökumətlərarası Komissiyanın iclası çərçivəsində bildirib.
“Çox məhsuldar müzakirələr apardıq və iki ölkə arasında istər iqtisadi və siyasi, istərsə də sosial sahələrdə olduqca yaxşı münasibətlər formalaşır. Düşünürəm ki apardığımız prosesdə həm Azərbaycan, həm də Moldova tərəfinin maraqlarının nəzərə alınması əldə etdiyimiz nailiyyətlərdən biridir. Bu, analoji iclasların keçirilməsində çox layiqli səviyyədir və prosesi davam etdirmək qərarına gəldik”.
Bölmənin digər xəbərləri
