Monqolustanda Çinin Han sülaləsi dövrünə aid təqribən 2100 il yaşı olan əsgər məzarlığı tapılıb
Bakı, 18 mart, AZƏRTAC
Arxeoloqlar Monqolustanda Çinin Han sülaləsi dövrünə aid təqribən 2100 il yaşı olan əsgər məzarlığı tapıblar.
AZƏRTAC xarici mediaya istinadla xəbər verir ki, DNT testləri məzarlıqda aşkarlanan sümüklərin Han və Şimali Çin əhalisi ilə əlaqəli əsgərlərə aid olduğunu təsdiqləyir. Rusiya Elmlər Akademiyasının əməkdaşı Aleksey Kovalyovun rəhbərlik etdiyi arxeoloqlar qrupu Monqolustanın cənubundakı Bayanbulaq arxeoloji sahəsində döyüşçülərin qəbiristanlığını aşkar ediblər. Bu ərazidə eramızdan əvvəl II əsrdə köçəri Xiongnu tayfasına qarşı vuruşan Han əsgərlərinin parçalanmış cəsədlərinin olduğu 2100 illik kütləvi məzarlıq var.
Tədqiqatçılar 20-dən çox skeletin olduğu bir çuxur tapıblar, onların bir çoxunda parçalanma, kəsilmiş başlar və şikəstlik əlamətləri var. Kütləvi məzarlığa çevrilməmişdən əvvəl bu çuxur gil hasilatı üçün istifadə edilmişdi. Yeni tapıntı Han-Xiongnu münaqişələri zamanı qədim müharibənin vəhşi təbiəti haqqında məlumat verir.
Aleksey Kovalyov deyib: “Han mədəniyyətində bədənin parçalanması ölümün ən alçaldıcı yolu hesab olunurdu. Parçalayaraq öldürmək ən rüsvayçı edam növü idi. Bunu edən düşmənlər hesab edirdilər ki, həmin insanların ruhu heç vaxt yenidən doğulmayacaq”.
Eramızdan əvvəl 104-cü ildə tikilmiş Bayanbulaq qalası Xiongnu basqınlarından müdafiə üçün nəzərdə tutulmuş bir çox Han istehkamlarından biri idi. Bu istehkamlar Çinin kənd yerlərindən göndərilən Han qoşunları tərəfindən idarə olunurdu. Əsgərlərin hansı şəraitdə həlak olduğu və cəsədlərinin çuxura necə yerləşdirildiyi məlum deyil. Bir nəzəriyyəyə görə, onlar müharibə əsirləri idilər, xəbərdarlıq və ya ayinlərin qurbanı olaraq Xiongnu tərəfindən əsir götürülərək öldürülüblər.
Bölmənin digər xəbərləri
