Moskva, 13 dekabr, AZƏRTAC

Moskvada Azərbaycan xalqının Ümummilli Lideri Heydər Əliyevin xatirəsinə həsr olunmuş tədbir keçirilib.

AZƏRTAC xəbər verir ki, Azərbaycanın Rusiyadakı səfirliyinin təşkilatçılığı ilə keçirilən tədbirdə bu ölkənin tanınmış siyasi və ictimai xadimləri, xarici ölkələrin Moskvada akkreditə olunmuş diplomatik korpusunun, Azərbaycan diasporunun təmsilçiləri iştirak ediblər.

Gecənin qonaqları Heydər Əliyevin həyat və çoxşaxəli fəaliyyəti haqqında fotosərgi ilə tanış olublar.

Tədbiri açan Azərbaycanın Rusiyadakı səfiri Rəhman Mustafayev qeyd edib ki, Azərbaycan dövlətçiliyinin qorunub saxlanması və dirçəlişi Heydər Əliyevin adı ilə bağlıdır. O, Ulu Öndər Heydər Əliyevin Azərbaycan SSR-in rəhbəri vəzifəsindəki uğurlarından danışıb, bu illəri respublikanın intibah dövrü kimi səciyyələndirib.

R.Mustafayev vurğulayıb ki, bu uğurlar əhəmiyyətli dərəcədə Heydər Əliyevin SSRİ Nazirlər Soveti sədrinin birinci müavini vəzifəsini tutmasının, Moskvada ölkənin sosial, iqtisadi və ideoloji həyatının ən ciddi sahələrinə rəhbərlik etməsinin əsası olub.

“Onun Moskvada işlədiyi illər də parlaq, nailiyyətlərlə dolu olub”, - deyən R.Mustafayev 1993-cü ildə Heydər Əliyevin hakimiyyətə qayıdışının Azərbaycan tarixinin ən çətin və məsuliyyətli dövrünə təsadüf etdiyini vurğulayıb. “Ölkəmiz müstəqilliyini itirməyin və süqut etməyin bir addımlığında idi. Heydər Əliyev qısa müddət ərzində respublikada vəziyyəti bərpa edə, iqtisadiyyatı və sosial sahəni sabitləşdirə bildi. Heydər Əliyev işğaldan azad edilmiş Qarabağı görmədi. Amma onun tarixi missiyası ondan ibarət idi ki, bizim qələbəmiz üçün təməl yaratdı. Prezident İlham Əliyev bu təməl üzərində qələbə strategiyasını yaratdı və onu uğurla həyata keçirdi”, - deyə səfir xüsusilə vurğulayıb.

Rusiyanın xarici işlər nazirinin müavini Mixail Qaluzin çıxışında Heydər Əliyevin xatirəsinin Rusiyada yaşadığını bildirib. “Biz onu hər zaman Azərbaycan xalqının görkəmli dövlət xadimi və Ümummilli Lideri və əlbəttə ki, şanlı ortaq tariximizi simvolizə edən şəxsiyyət kimi xatırlayırıq”, - deyə diplomat qeyd edib.

M.Qaluzin Heydər Əliyevin Sovet İttifaqının inkişafındakı xidmətlərindən danışıb: “Sovet Azərbaycanının rəhbəri kimi Heydər Əliyev onun mütərəqqi inkişafına sanballı töhfələr verib. Məhz bu xidmətləri onun SSRİ Nazirlər Soveti sədrinin birinci müavini kimi yüksək vəzifəyə təyin edilməsinə səbəb olmuşdu. Bu vəzifədə, əlbəttə ki, Heydər Əliyev Sovet İttifaqının mütərəqqi sosial-iqtisadi inkişafında çox mühüm rol oynayıb”.

Nazir müavini qeyd edib ki, Heydər Əliyev Baykal-Amur magistralını bütün ölkə üçün yaradıb: “O, magistralı bütün ölkə üçün yaradıb və bu gün həmin yol Rusiya, MDB, Avrasiya və bütün dünyanın ən mühüm nəqliyyat arteriyasıdır”.

Rusiya və Azərbaycan Şimal-Cənub Dəhlizinin qərb qolunun yaradılması üzərində işləyir. Bu, Azərbaycan ərazisindən keçməklə Rusiyanın Arktikasını Hind okeanını İran sahilləri ilə birləşdirən layihədir.

“Heydər Əliyevin qurduğu BAM-ın ruhu bu gün bizim əməkdaşlığımızda da yaşayır. Moskva ilə Bakı arasında münasibətlər Cənubi Qafqazda, Xəzər dənizində və MDB məkanında mühüm sabitlik amilinə çevrilir”, - deyə o bildirib.

M.Qaluzin vurğulayıb ki, Azərbaycan və Rusiya prezidentləri İlham Əliyev və Vladimir Putin müttəfiqlik qarşılıqlı fəaliyyət haqqında Bəyannamə imzalamaqla Rusiya-Azərbaycan münasibətlərinə yeni keyfiyyət bəxş ediblər və bu, iki ölkənin xalqlarının mənafeyinə xidmət edir.

“Bam birliyi” Ümumrusiya ictimai təşkilatının prezidenti, Baykal-Amur Dəmir Yolunun Tikintisi üzrə Baş İdarəsinin rəisi, Rusiya İnşaatçılar İttifaqının İdarə Heyətinin üzvü Yefim Basin Heydər Əliyevi özünün müəllimi və rəhbəri adlandırıb, Azərbaycan xalqının Ümummilli Lideri ilə bağlı xatirələri bölüşüb. “Heydər Əliyevin xatirəsinə stansiyalardan birində xatirə lövhəsi vurulub. Məhz bu stansiyadan keçən teplovozlar daim siqnal verir”, - deyə BAM veteranı bildirib.

Fəridə Abdullayeva

AZƏRTAC-ın xüsusi müxbiri

Moskva