MOSKVADA “MUZEYDƏ GECƏ” AKSİYASI KEÇİRİLMİŞDİR
AZƏRTAC-ın xüsusi müxbiri xəbər verir ki, Moskvada şənbə günündən bazar gününə keçən gecə Rusiya paytaxtının 130 muzeyinin qapılarını açan “Muzeydə gecə” aksiyası keçirilmişdir. Muzeylər öz peşəkar bayramı münasibətilə adamları pulsuz qəbul edirdi.
Ən populyar A.S.Puşkin adına Dövlət Təsviri Sənət muzeyinə gələn insanların sayı-hesabı yox idi. Buraya gələnlər əsas binada daimi ekspozisiyaya, “Ailədə” sərgisinə tamaşa etmiş və başlıcası, Parmicaninonun “Antey” əsərini seyr etməyə imkan tapmışlar. Bir şəkildən ibarət sərgi bu yaxınlarda açılmışdır və bir çoxları gündüz bura düşə bilmirlər. Burada həm də Ukrayna Prezidenti Viktor Yuşşenkonun toplusundan XIX əsrə aid heykəllər və xalq ikonası kolleksiyasına baxmaq mümkün idi.
Uzun növbələr düzülmüş digər muzeylərin önundə də analojı vəziyyət yaranmışdı. Moskva muzeylərinə düşmək istəyənlər kifayət qədər çox idi.
Paytaxtın hakimiyyət orqanları “Muzeydə gecə”nin keçirilməsi zamanı təhlükəsizliyin qayğısına qalmışlar. Bütün dövlət muzeylərində və qalereyalarında milis əməkdaşları və “təcili yardım” maşınları növbə çəkirdilər.
Moskva Mədəniyyət Komitəsinin rəhbəri Sergey Xudyakovun dediyinə görə, gözlənilirdi ki, həmin gecə bütün 130 açıq muzeyə təqribən yarım milyon insan gələcəkdir. Təşkilatçıların vəd etdikləri kimi, aksiya ənənəyə çevrilərsə, gələn il muzeylərə gələnlərin sayı daha da artacaqdır.
Bölmənin digər xəbərləri
