MOSKVADA VAHİD MİQRASİYA PƏNCƏRƏSİ YARADILACAQ
AZƏRTAC-ın xüsusi müxbiri xəbər verir ki, Moskvaya əcnəbi işçi qüvvəsinin cəlb olunması kvotası iyunun əvvəllərində qurtaracaqdır. Bunu Rusiya paytaxtı hökumətinin iclasında Moskva Federal Miqrasiya Xidməti İdarəsinin (MFMXİ) rəisi Fyodor Karpovets bildirmişdir. Onun sözlərinə görə, 2008-ci ildə idarə miqrantlara işləmək üçün təxminən 300 min icazə vermişdir. O xatırlatmışdır ki, paytaxt bu qədər miqrantın əməyindən 2008-ci ildə istifadə etmək hüququna malikdir. F.Karpovets demişdir: “Əgər sənədlərin qəbulu bu sürətlə gedərsə, kvota iyunun əvvəllərində qurtaracaqdır”. O vurğulamışdır ki, hər gün MFMXİ-yə işə götürənlərdən miqrantları işə götürmələri barədə təxminən 1,5 min bildiriş daxil olur. Lakin onların heç də hamısı miqrantları leqal surətdə işə götürmürlər. Bu ilin 4 ayı ərzində əcnəbi işçi qüvvəsini qeyri-qanuni cəlb etdiklərinə görə Moskva firmaları 100 milyon rubldan artıq cərimə ödəmişlər.
Moskva Regionlararası Əlaqələr və Milli Siyasət Komitəsinin sədri Aleksey Aleksandrov iclasda bildirmişdir ki, ötən il ərzində Moskva işəgötürənləri əmək miqrantlarından qeyri-leqal istifadə etdiklərinə görə təxminən 220 milyon rubl məbləğində cərimə olunmuşlar. A.Aleksandrov məlumat vermişdir ki, 2007-ci ildə paytaxtda 1,7 milyon miqrant qeydiyyatdan keçmişdir ki, onların da 640 mini işləmək üçün icazə almış, 300 mindən çox miqrant rəsmən işə götürülmüşdür. Onun sözlərinə görə, 2008-ci ilin iyununda paytaxt hakimiyyəti “Moskva vahid miqrasiya pəncərəsi” (MVMP) pilot layihəsinin gerçəkləşdirilməsinə başlayacaqdır. Bu layihə əcnəbi işçilərə sənədləri bir yerdə qeydiyyatdan keçirməyə imkan verəcəkdir. MVMP-nın tərkibinə dövlət təşkilatları, o cümlədən MFMXİ və Moskva Məşğulluq İdarəsi daxil olacaqdır. Bu təşkilatlar miqrantların qəbulu və təyinatı, sənədlərin qeydiyyata alınması və yoxlanması, işləmək üçün icazələrin verilməsinin təşkili, işədüzəltmə ilə məşğul olacaqlar. Pilot layihəsini hər il 4,5 min əcnəbi işçi cəlb edən “ZİL” zavodunun bazasında həyata keçirmək nəzərdə tutulmuşdur.
A.Aleksandrov demişdir: “Bu cür tədbirlər əcnəbi işçi qüvvəsinin cəlb olunması məsələsində daha mütəşəkkil səviyyəyə qalxmağa imkan verəcəkdir”. Rusiya paytaxtı bu məqsədlə işəgötürənə digər ölkələrdən işçi qüvvəsi cəlb etməyə imkan verən sistem işləyib hazırlamışdır. Paytaxt hökuməti orqanları Qırğızıstan, Tacikistan və Özbəkistan ilə müvafiq sazişlər bağlamışdır. İyunun əvvəllərində bu ölkələrin hər birindən işləmək üçün Moskvaya min adam gələcəkdir. Bundan əlavə, müvəqqəti inzibati-məişət şəhərciklərinin (İMŞ) layihəsi işlənib hazırlanmışdır. Bu şəhərciklərdə miqrantlar müvəqqəti yaşaya biləcəklər. A.Aleksandrov demişdir: “Yeni qanunvericilik İMŞ-nın sahiblərinə burada yaşayan əcnəbi işçiləri miqrasiya uçotuna götürmək hüququ verir. Lakin qüvvədə olan sanitar norma və qaydaları əvvəlki şəhərciklərin bu məqsədlə istifadə olunmasına icazə vermir. Problemin həlli məqsədilə paytaxt hökuməti İMŞ layihəsi işləyib hazırlamışdır”. Bu cür şəhərcikdə 100 nəfər yaşaya bilər. A.Aleksandrov əlavə etmişdir ki, cari ilin 3-cü və 4-cü rüblərində paytaxtda “Qonaq kartı” elektron plastik kartları tətbiq ediləcək və miqrantlar haqqında vahid müəssisələrarası analitik məlumatlar bankı yaradılacaqdır. “Qonaq kartı”nda miqrantın hakimiyyət orqanları ilə, o cümlədən miqrasiya xidməti, məşğulluq mərkəzi, səhiyyə müəssisələri, vergi xidməti ilə qarşılıqlı münasibətləri barədə informasiya əksini tapacaqdır.
Bölmənin digər xəbərləri
