Bakı, 13 avqust, AZƏRTAC

Biznes mühiti və beynəlxalq reytinqlər üzrə Komissiyanın “Mübahisələrin həlli, məhkəmə sistemi və hüququn aliliyi” işçi qrupunun Ədliyyə Nazirliyinin inzibati binasında Kiçik və Orta Biznesin İnkişafı Agentliyinin (KOBİA) dəstəyi ilə sahibkarlıq subyektləri ilə görüşü keçirilib.

KOBİA-dan AZƏRTAC-a verilən məlumata görə, görüş çərçivəsində işçi qrupun rəhbəri, nazirliyin Strateji planlaşdırma və monitorinq baş idarəsinin rəisi Toğrul Hüseynov və işçi qrupun digər üzvləri tərəfindən sahibkarların qarşılaşdıqları çətinliklər, işçi qrupun fəaliyyətində görmək istədikləri islahatlar və yeniliklər dinlənilib, onları maraqlandıran suallar cavablandırılıb və müvafiq sahədə qanunvericiliyin müddəaları onların diqqətinə çatdırılıb.

Görüşdə, həmçinin Dünya Bankı Qrupunun “Business Ready” hesabatının “Mübahisələrin həlli” indikatoru ilə bağlı müvafiq sahədə təkmilləşmələrin və kommunikasiyanın həyata keçirilməsinə dair 2024-cü il üzrə Yol Xəritəsi” çərçivəsində işçi qrupu tərəfindən görülmüş işlər barədə sahibkarlara məlumat verilib.

Qeyd olunub ki, “Mübahisələrin həlli, məhkəmə sistemi və hüququn aliliyi” işçi qrupunun əsas məqsədi öz fəaliyyət istiqamətlərinə uyğun olaraq biznesin təşviqinə şərait yaradan bütün aspektlərin inkişaf etdirilməsi, maneələrin aradan qaldırılması, mübahisələrin həlli mexanizmlərinin təkmilləşdirilməsi və onların əlçatanlığının təmin edilməsidir. Bu məqsədlə mübahisələrin həlli, məhkəmələrin və digər orqanların qərarlarının operativ icrası və effektivliyinin təmin edilməsi istiqamətində işçi qrup tərəfindən mühüm islahatlar aparılır.

Tədbir iştirakçılarının diqqətinə çatdırılıb ki, icra hərəkətlərinin həyata keçirilməsində nağdsız hesablaşmaların tətbiqi, borclunun elektron pul təşkilatlarında olan vəsaitlərinə tutmanın yönəldilməsi, icra sənədlərinin icrasından yayınan hüquqi şəxslərin rəhbərlərinin ölkədən getmək hüququnun məhdudlaşdırılması, habelə onların axtarışının təşkili ilə bağlı və digər layihələr hazırlanaraq aidiyyəti üzrə təqdim edilib. Bununla yanaşı, icra sisteminin maksimum rəqəmsallaşdırılması, bir sıra icra hərəkətlərinin tam avtomatlaşdırılması və icra sənədlərinin icrasında operativliyin təmin edilməsi məqsədilə “Elektron icra” informasiya sisteminin təkmilləşdirilməsi istiqamətində işlərin aparıldığı bildirilib. Həmçinin vurğulanıb ki, ədliyyə orqanları tərəfindən göstərilən elektron xidmətlərin sayı artırılaraq “İcra məmuruna elektron müraciət” xidməti istifadəyə verilib. Yeni xidmətdən istifadə etmək üçün nazirliyin rəsmi internet səhifəsində “Dövlət xidmətləri” bölməsindən “İcra xidmətləri” hissəsinə keçid etməklə vətəndaşlar FİN və doğum tarixi əsasında sorğu edərək özlərinin tərəf olduqları icra işləri barədə məlumatları əldə edə, seçdikləri işlə bağlı icra məmuruna müraciət edə, habelə zəruri sənədləri həmin müraciətə əlavə edə bilərlər. “Vahid məhkəmə portalı”nın yeni versiyası da formalaşdırılaraq istifadəyə verilib. Burada geniş auditoriyanın məhkəmə statistikası sahəsində məlumatlara əlçatanlığının təmin edilməsi məqsədilə “Məhkəmə statistikası” bölməsi yenilənərək yeni statistik göstəricilər əlavə edilib.

Görüşdə mübahisələrin alternativ həlli mexanizimlərindən olan mediasiya sisteminin elektronlaşdırılması üzrə də işlərin yekunlaşma mərhələsində olduğu, e-mediasiya portalının hazırlandığı və onun çox az ölkə istisna olmaqla analoji modelinin mövcud olmadığı qeyd edilərək, portalın yaxın vaxtlarda ictimaiyyətə təqdim olunacağı bildirilib. Mübahisələrin alternativ həlli yollarından olan arbitraj institutunun ölkəmizdə inkişaf etdirilməsi yönündə islahatların aparıldığı, bu institutun elektronlaşması üzrə işlərə başlanıldığı da qeyd edilib.

Biznes Mühiti və Beynəlxalq Reytinqlər üzrə Komissiyanın “Mübahisələrin həlli, məhkəmə sistemi və hüququn aliliyi” işçi qrupuna rəhbərliyi Ədliyyə Nazirliyi həyata keçirir.