Naxçıvan, 16 yanvar (AZƏRTAC). Yanvarın 16-da Naxçıvan Muxtar Respublikası Ali Məclisinin sədri Vasif Talıbov Naxçıvan avtomobil zavoduna gəlmiş, burada istehsalına yeni başlanılan cip tipli minik avtomobilinin texniki xüsusiyyətləri və keyfiyyət göstəriciləri ilə tanış olmuşdur.

Ali Məclisin sədri yeni avtomobil modelinin istehsalı münasibətilə kollektivi təbrik edərək demişdir ki, bir neçə il bundan əvvəl Naxçıvanda minik avtomobillərinin istehsalı barədə qəbul olunmuş qərar bu gün öz bəhrəsini verir. Zavodda avtomobil istehsalı üçün uğurlu modellərin seçilməsi, bazarda özünə yer tutan keyfiyyətli avtomobillərin istehsalı alıcı rəğbətinin qazanılmasına səbəb olmuşdur. Bu gün zavodda yeni modeldə avtomobillərin istehsalına başlanılır. Gələcəkdə istehsal olunan modellər tələblər nəzərə alınaraq daha da təkmilləşdiriləcəkdir. Avtomobillərə yüksək texniki xidmətin göstərilməsi üçün yeni texniki xidmət mərkəzlərinin yaradılması da nəzərdə tutulur.

Ali Məclisin sədri qeyd etmişdir ki, müasir dövrdə insanlar daha az yanacaq sərf edən, keyfiyyəti ilə seçilən, ehtiyat hissələri ucuz başa gələn, komfortlu və təhlükəsiz avtomobillərə daha çox üstünlük verirlər. Naxçıvanda istehsal olunan avtomobillər də bu baxımdan alıcıların tələblərinə tam uyğundur. İnsanların sağlamlıqlarının, təhlükəsizliklərinin qorunması, baş verə biləcək qəzalar zamanı onların həyatının xilası daim diqqət mərkəzində saxlanılmalıdır. Bu vacib məsələlərə dövlətimiz tərəfindən xüsusi diqqət yetirilir.

Vurğulanmışdır ki, zavodda istehsal olunan avtomobillərə təkcə ölkə daxilində yox, xaricdə də tələbat vardır. Ona görə də avtomobillərin təhlükəsizlik standartlarına cavab verən tələblər səviyyəsində keyfiyyətlə istehsalına ciddi diqqət yetirilməlidir.

Gəncə avtomobil zavodunun direktoru Xanlar Fəthiyev Naxçıvanda müasir modeldə avtomobillər istehsal edən zavodun fəaliyyət göstərməsinin muxtar respublikanın yüksək iqtisadi inkişafının daha bir göstəricisi olduğunu qeyd etmiş, yaradılan şəraitə görə minnətdarlığını bildirmişdir.

Məlumat vermişdir ki, 2010-cu ilin yanvar ayında fəaliyyətə başlayan zavodun illik istehsal gücü 4 min minik avtomobilidir. Burada avtomobillərə satışdan sonra da yüksək texniki xidmət göstərilir. Hazırda zavodda “NAZ Lifan-320”, “NAZ Lifan-520” və “NAZ Lifan-620” markalı minik avtomobilləri istehsal olunur. Artıq Naxçıvan avtomobil zavodunda yeni “NAZ Lifan X-60” markalı cip minik avtomobillərinin də istehsalına başlanılmışdır.

Ali Məclisin sədri hazır və yığılma–istehsal mərhələsində olan yeni avtomobillərin texniki göstəriciləri ilə maraqlanmışdır.

Məlumat verilmişdir ki, mexaniki sürət qutusu ilə təchiz edilmiş yeni avtomobil qənaətcilliyi və yüksək manevr qabiliyyəti ilə seçilir və 100 kilometrə 8,2 litr yanacaq sərf edir. Muxtar respublikanın relyefi üçün də əlverişli olan bu minik maşınları müasir interyerə və özünəməxsus xarici dizayna malik olmaqla bərabər, həm də “Avro-3” standartlarına uyğundur. Minik avtomobili çətin yol şəraiti üçün də idealdır. Bütün bu xüsusiyyətlər avtomobilin daxili və xarici bazarda tezliklə özünə yer tapacağına əminlik yaradır.

Qeyd olunmuşdur ki, ön ötürmə ilə təmin olunmuş avtomobil dözümlülüyü və yüksək keyfiyyəti ilə fərqlənir. Bütün kateqoriyalar üzrə standartlara uyğun olan avtomobilin geniş yük yeri, təhlükəsizlik yastıqları, ABS əyləc sistemi və kondisioneri vardır. ABS əyləc sistemi baş verə biləcək qəzaların qarşısının alınmasında mühüm əhəmiyyətə malikdir. Qiyməti 13 min 500 manat olan yeni minik maşınlarını 2 illik zəmanətlə kreditlə də almaq mümkündür.

Bildirilmişdir ki, Almaniya, İtaliya və Belçika istehsalı olan ən müasir avadanlığın quraşdırıldığı zavodda texniki imkanlardan səmərəli istifadə olunaraq “NAZ Lifan-320” və “NAZ Lifan-620” markalı avtomobillərin avtomat sürət qutusu ilə istehsalına da başlanılmışdır.