Naxçıvan Dövlət Universitetində 2024-2025-ci tədris ilinə aid təcrübələrin yekun konfransı keçirilib
Naxçıvan, 10 iyul, AZƏRTAC
İyulun 10-da Naxçıvan Dövlət Universitetində 2024-2025-ci tədris ilinə aid təcrübələrin yekun konfransı keçirilib.
Universitetin Media və ictimaiyyətlə əlaqələr şöbəsindən AZƏRTAC-ın bölgə müxbirinə bildirilib ki, əvvəlcə pedaqoji təcrübədə olan tələbələrin sınaq dərsləri zamanı istifadə etdikləri əyani vəsaitlər və şagirdlərlə birgə qrup işlərində hazırladıqları təqdimatlardan ibarət sərgiyə baxış olub.
Konfrans 2024-2025-ci tədris ilinə aid təcrübələrdən hazırlanan videoçarxın nümayişi ilə başlayıb. Naxçıvan Dövlət Universitetinin rektoru Elbrus İsayev konfransın sadəcə təcrübələrin yekunu deyil, eyni zamanda, məzunların buraxılış tədbiri kimi də əhəmiyyətli olduğunu vurğulayıb. Rektor pedaqoji və istehsalat təcrübələrini universitet həyatında iki mühüm hadisə adlandırıb, ixtisaslı kadrların hazırlanmasının nəzəri və praktik aspektlərindən bəhs edib.
Elbrus İsayev qeyd edib ki, universitetdə məzunların əmək bazarında bilik və bacarıqlarına uyğun layiqli yer tutmaları hər zaman diqqətdədir və bu istiqamətdə bu il olduğu kimi, gələcəkdə də universitet-hökumət-sənaye işbirliyi əməkdaşlığının genişləndirilməsi planlaşdırılır.
“Ali təhsil ocağı olaraq əmək bazarının tələblərinə uyğun ixtisaslı kadrların hazırlanmasında faydalı əməkdaşlıqda maraqlıyıq və bu il təşkil olunan II Karyera sərgisi məzunların ixtisasına uyğun işlə təminatını asanlaşdırmaq baxımından əhəmiyyətli platforma oldu. Zəngin kadr potensialımız var. Hətta bu il elə ixtisaslarımız var ki, məzunların 50-60 faizi magistratura pilləsinə qəbul olub, bu, keyfiyyətli təhsilə əsaslanan önəmli göstəricidir”, – deyə o qeyd edib.
Elbrus İsayev tədris və təcrübə prosesində Universitetin Strateji inkişaf və Keyfiyyət təminatı şöbəsi tərəfindən davamlı monitorinqlər aparıldığını, bütün bunların keyfiyyəti daha da artırmaq məqsədli olduğunu qeyd edib.
Naxçıvan Dövlət Universitetinin Karyera, təcrübə və məzunlarla iş sektorunun müdiri Aynurə Seyidova 2024-2025-ci tədris ilinə aid təcrübələrin yekun hesabatı barədə məlumat verib. Vurğulanıb ki, bu tədris ilinin ikinci yarısında universitet üzrə təcrübədə 1544 tələbənin iştirakı qeydə alınıb. Onlardan 443 tələbə pedaqoji, 1101 tələbə isə istehsalat təcrübələrində olub. 1284 tələbə əyani, 191 tələbə qiyabi, 69 tələbə isə əlavə və alt qrup olmaqla təcrübələrdə iştirak edib. Tələbələrin istehsalat təcrübəsi 44 müəssisə və təşkilatda təşkil olunub. On fakültədən 54 fərqli ixtisaslar üzrə 1101 nəfər tələbə təcrübələrdə iştirak edib. Təcrübələrin müddəti müxtəlif ixtisaslarda 4, 5, 14 və 20 həftəlik olub. Eyni zamanda, tələbələrə Naxçıvandan kənarda da təcrübə imkanı yaradılıb.
Bildirilib ki, 2024-2025-ci tədris ilinin birinci yarısında “Baytarlıq təbabəti” ixtisası üzrə 3 tələbə Türkiyə Respublikasının Qars Qafqaz Universitetində təcrübədə olub. Həmin tədris ilinin ikinci yarısında isə 3 fakültə üzrə 20 tələbə Türkiyə Respublikasının Qaradəniz Texnik Universitetində, Qars Qafqaz Universitetində, Azərbaycanda Torpaqşünaslıq və Aqrokimya İnstitutunda, Gömrük Komitəsində, Heydər Əliyev Mərkəzində, İnsan Hüquqları üzrə Müvəkkillikdə, Şəms Tərcümə Mərkəzində təcrübə keçiblər. Yekunda universitet üzrə təcrübələrdən keçməyən tələbələrin sayı 16 nəfər olub.
Aynurə Seyidova ali təhsil ocağında təcrübə dövründə olan yenilikləri də diqqətə çatdırıb.
Sonra 2024-2025-ci tədris ilinə aid təcrübələrə dair fakültə dekanlarının hesabatları dinlənilib.
Sonda təcrübə dövründə fərqlənən tələbələr mükafatlandırılıb.
Bölmənin digər xəbərləri
